A asociación cultural A Chaínza organiza o sábado 20 o XIV Festival da Chaira, unha cita que encherá de ritmos e de actividades a praia de Baltar, na Pastoriza.
"Intentamos cambiar un pouco o programa para achegarnos a todos os públicos, teremos actividades durante todo o día para que non sexan só concertos, e poder chegar así aos maiores e aos nenos", indica David Saavedra, un dos membros da organización, que asegura que o festival xa é unha cita asentada no calendario estival chairego e que xa conta cun público fiel.
"Se conseguimos chegar ao milleiro este ano sería espectacular", apuntan desde a organización, á vez que animan ao público a sumarse a un festival que se organiza en plena natureza e que ofrece unha xornada chea de actividades. Ademais, como en anteriores ocasións, disporá de zona de acampada na carballeira.
O festival arrancará ás 11.00 horas coa Ruta A Espiga, un percorrido circular duns sete quilómetros de lonxitude e "alcanzable para todo o mundo", que incluirá paradas no castro de Saa, a ponte de Crecente ou os Muíños de Anllo.
O programa continuará ás 13.30 horas cunha sesión vermú folk, na que actuarán o Grupo Tradicional da Pastoriza e Caivanca, e tras as comidas campestres, a partir das 17.00 horas, será a quenda dos xogos populares e unha nova edición do Aberto da Billarda, que cumpre dez anos no festival.
Tras os xogos, ás 18.30 horas están previstas actividades infantís da man da compañía Duende Circo e ás 19.30 horas arrincará un taller de baile aberto a todo o público e previo á actuación da Asociación Cultural A Fonte de Merlán.
"O obxectivo é que a xente aprenda a bailar primeiro no obradoiro de baile e que logo o poña en práctica non concerto que hai despois", chancean desde a asociación pastoricense.
Os concertos nocturnos arrincarán a partir das 21.30 horas e sobre o escenario tocarán Voladura -o grupo meirego do director Andrés Goteira-, Maskarpone e Brigada Sound, dúas formacións que chegan desde Ourense, e O Puto Coro do Exército Froilanista e The Lelli Kelly's, ambos grupos da Coruña.
"Este ano podemos destacar a diversidade que haberá nos concertos, porque realmente hai un pouco de todo, dende rock e versións a ska ou fusión", explican os organizadores do festival pastoricense.
