As VI Olimpíadas Populares Galegas (OPG), unha cita itinerante para colectivos sociais que viviu a súa última edición en Cerdedo en 2016, celebraranse o fin de semana do 8 e o 9 de setembro en Guitiriz, na que será a súa primeira convocatoria na provincia de Lugo.
As probas do sábado terán como escenario o CIT e a Carballeira de Parga. Ás 9.00 horas recibirase aos equipos participantes —cun mínimo de cinco integrantes cada un—, entregaranse os dorsais e haberá un almorzo colectivo.
A competición matutina estrearase cunha carreira de 100 metros lisos e completarase con chave, salto de lonxitude e arrebolamento de sacho. Tras a comida, haberá xadrez, tiro de fisga, canhoteiros, billarda e voleibol.
O domingo a competición trasládase a Sete Muíños, con probas de lanzamento de boina, tríatlon por substitucións, loita galega, tiro de corda, 5.000 metros e brilé. Ás 19.00 horas clausurarase a cita cunha asemblea e a entrega de premios.
As OPG estreáronse en Ribadavia en 2011, como punto de encontro lúdico para integrantes de distintos colectivos sociais e culturais de Galicia.
Os interesados en informarse sobre as olimpíadas ou apuntarse poden porse en contacto coa organización a través das redes sociais, onde tamén se poden descargar as bases, ou o correo electrónico [email protected]. O custo por equipo é de 20 euros e o prazo para inscribirse péchase este venres.
