martes. 20.08.2019 |
El tiempo
martes. 20.08.2019
El tiempo

Un vilalbés denuncia que Entrepinares está "a usurpar" a súa leira no polígono

Atilano Burgo e Manuel Felpeto, ante a leira afectada. S.IGLESIA
Atilano Burgo e Manuel Felpeto, ante a leira afectada. S.IGLESIA

A parcela viuse afectada polos traballos de ampliación da firma láctea, desde onde aseguran que "todos os papeis están en regra"

Un veciño da parroquia vilalbesa de Lanzós, Manuel Felpeto, denuncia que a empresa láctea Entrepinares está "a usurpar" a súa leira situada no polígono industrial de Vilalba.

A parcela afectada polos traballos de ampliación das instalacións lácteas ten unha superficie de 9.383 metros cadrados, estaba plantada con bidueiros e piñeiros na súa maioría e, segundo o prexudicado e a súa familia, "está escriturada no rexistro e hai un informe pericial no que se recoñecen os lindes".

Segundo Manuel, xa son dúas as denuncias interpostas e tres as reunións que mantivo co xerente de Entrepinares, Javier Gato, coa intención de chegar "a un acordo e que a compre, que nós vendémoslla sen problema".

Así, o damnificado culpa ao rexistro catastral, xa que Entrepinares adquiriu as seis leiras -duns 65.000 metros cadrados en total- mediante catastro para desenvolver a ampliación. Segundo Felpeto, nese rexistro aparece como leira súa "a que en realidade é de Atilano Burgo e, se nós seguiramos para adiante, invadiriamos a parcela del e acabariamos a mal entre nós".

Deste xeito, a propiedade de Manuel son as parcelas 56, 57 e 68 do polígono 64 no Monte do Cabrón, e non a parcela 58, que correspondería a Atilano.

Tal e como afirma o denunciante, "un día puxeron as barreiras para pechar as leiras a ocupar e denunciámolo á Garda Civil", e unha semana despois "empezaron a meter as máquinas para ir tallando as árbores", di incrédulo ante a "actitude avasaladora" da empresa, que "continúa cos traballos cando aínda non se pronunciou o xuíz".

Pola súa banda, desde a firma láctea non queren "darlle máis peso a isto" e inciden en que "o único que temos é unha obra con tódolos papeis e toda a documentación en regra", conclúen.

Un vilalbés denuncia que Entrepinares está "a usurpar" a súa leira...
Comentarios