O Concello de Vilalba retoma a súa programación cultural uníndose á campaña Cultura Segura, a través da que se ofrecerá teatro, música, danza e cine repartidos en 18 actos que se celebrarán no auditorio municipal Carmen Estévez.
Os espectáculos, que empezarán este venres 25 e se prolongarán durante os meses de outubro e novembro, serán con aforamento limitado e cun "estrito cumprimento de todos os protocolos sanitarios", indican desde o goberno local vilalbés.
"Os espectáculos culturais son seguros, así o levan demostrando desde hai tempo, e o Concello leva semanas traballando para ofrecer esa seguridade no auditorio, reducindo o seu aforamento ata 96 prazas habilitadas das 500 existentes", explicou a alcaldesa, Elba Veleiro. Engadiu que apostar por esta programación é mostrar "apoio a un sector fundamental para o desenvolvemento das persoas e das sociedades, pero moi prexudicado por esta crise, xa que foron os primeiros en pechar e os últimos en reincorporarse".
O primeiro espectáculo será este venres, ás 20.00 horas, a cargo de Ítaca Teatro, que levará a escena Pinconús, dirixida ao público familiar. A seguinte cita será o 3 de outubro, coa actuación do Mago Rafa, mentres que o 4 Acar Teatro do Mundo representará A Loka Historia de Frankenstein.
O día 10 do próximo mes proxectarase a longametraxe Reboiras de Alberto Mera. Malasombra Teatro actuará o 16 coa súa obra DEP e o 17 será a quenda do barítono Borja Quiza, con A emigración galega, cancións de ida e volta.
O grupo de percusión galega Pelepau estará no auditorio da capital chairega o día 23, mentres que a compañía Nova Galega de Danza ofrecerá o seu espectáculo Leira ao día seguinte.
Os eventos de novembro arrincarán o día 6 cun espectáculo sobre Rosalía de Castro. A figura de María Casares será a protagonista o 7, coa representación Despois das ondas.
A obra A conquista da escola de Madhubai, de Teatro do Atlántico, será o 14 e Cinco minutos sen respirar, de Ítaca Teatro, o 20. A banda de música de Vilalba ofrecerá o seu concerto de Santa Icía o 21; o 27 haberá música de cámara con Duobitatio e o 28 actuará A Trova Coruñesa.
NORMATIVA. Todos os actos serán gratuítos e será obrigatorio o uso de máscara. A apertura de portas farase 30 minutos antes do inicio de cada actividade.
Será imprescindible reservar butaca con anterioridade na páxina web www.entradasvilalba.es ou na casa da cultura. Poderanse retirar un máximo de dous por evento. Os aforamentos serán numerados, inhabilitando as butacas que non se ocupen. O despacho de billetes do auditorio abrirá unha hora antes de cada función e despacharanse entradas no caso de quedar dispoñibles, ata completar aforamento.
Contrapunto
O grupo Tanxugueiras, cuxo concerto do 13 de abril cancelouse pola pandemia, presentará o 13 de novembro o seu álbum Contrapunto.
