"Estamos esgotados pero moi satisfeitos. O balance é moi positivo. Houbo moita participación e moi bo ambiente", valoraban desde a comisión de festas de Vilalba no día no que as patronais, tras tres semanas repletas de actos e celebracións, dicían adeus. As festas de San Ramón e Santa María despedíronse este domingo, como marca a tradición, co Día das Parroquias, esta vez dedicado a Mourence.
A xornada arrincou con pasacalles a cargo das agrupacións locais Buxos Verdes e Entre Lusco e Fusco, que acompañaron á comitiva, entre a que se atopaban as autoridades e os representantes dos diferentes colectivos locais, ata a igrexa, onde se celebrou a misa.
"Ten Mourence moito bo para alegrar o corazón e moito bonito", resumiu o párroco de Vilalba
Alí, Inés Poupariña, a nova representante da parroquia homenaxeada este ano, tivo un protagonismo especial e, tras realizar a ofrenda —os veciños levaron unha cesta con produtos da terra e queixo San Simón— leu un discurso, que incluíu unha petición.
"Que se lle siga dando ás parroquias a importancia que se merecen para mantelas en activo", dixo a moza, que falou dunha parroquia medio rural, medio urbana, que suma pouco máis de cen habitantes e que "pode presumir de contar cun paseo polo que pasan centos de persoas" a beiras do río Magdalena.
As festas de San Ramón e Santa María despedíronse co Día das Parroquias
Pero tamén de ter un importante patrimonio etnográfico e relixioso, con varios muíños ou unha capela onde hai uns anos recuperouse unha romaría tradicional, de contar con gran parte das instalacións deportivas da capital chairega —no seu territorio están as piscinas e os campos de fútbol ou de tenis— ou con empresas con proxección internacional, como Champivil, que exporta desde hai décadas grelos ou cogomelos, e longa tradición, como embutidos Elote.
"Ten Mourence moito bo para alegrar o corazón e moito bonito", resumiu o párroco de Vilalba, Juan Pablo Alonso, na misa que pechou as celebracións relixiosas das patronais.
Fóra a xente apiñábase entre os postos da feira e a festa continuou un pouco máis tarde na praza da Constitución con sesión vermú con Pontevedra. A mesma orquestra compartiu escenario con New York na última verbena destas festas, unhas celebracións que non deixaron indiferente a ninguén e que incluíron novidades como o primeiro rei infantil ou a peonalización durante dous días da céntrica Rúa da Pravia.
