Vilalba será a sede, do 14 ao 21 de xullo, dun novo proxecto formativo teatral internacional, o Chá Summer School, unha iniciativa na que participarán 24 mozos de Escocia, Portugal, Italia e España.
A idea é que os asistentes, que terán entre 16 e 21 anos, con ou sen experiencia sobre as táboas, poidan convivir e buscar intercambio de vivencias cos veciños, as asociacións, diversas entidades e cos peregrinos do Camiño Norte para usalas como ferramentas de creación e aprendizaxe actoral e dramatúrgico.
A actriz Iria Azevedo é a directora dun proxecto "pioneiro" que traspasa fronteiras. "Eu levo colaborando coa Summer School de Ferrara dende hai tres anos. Pareceume interesante trasladar unha iniciativa similar a Galicia e vencellala ao Camiño de Santiago", explica a que foi directora das escolas municipais de teatro de Vilalba e Castro de Rei, e que tamén será unha das docentes deste campamento teatral.
O elenco de profesores será de categoría. Azevedo encargarase da formación en creación contemporánea e do uso do espazo escénico; o italiano Massimo Malucelli, de voz e creación de personaxe; a portuguesa Isabel Barros, de corpo e movemento, e o escocés Joe Gallagher, de texto e dramaturgia.
"Tres dos participantes chegarán do Centro Preformativo e Attoriale de Ferrara, outros tres de Replica Productions de Glasgow e outros tantos de Balleteatro do Porto", explica a directora, recalcando que tamén haberá 15 prazas para mozos galegos.
Os interesados en participar deberán enviar un email a [email protected] indicando no asunto Inscrición 2019. O prezo total será de 180 euros, incluíndo a matrícula ao curso, o material formativo, o aloxamento e a manutención.
As clases desenvolveranse do 15 ao 19 de xullo no auditorio municipal Carmen Estévez, en horario de mañá, de 10.00 a 13.30 horas, e de tarde, de 15.30 a 19.00 horas. Ao finalizar cada xornada haberá actividades culturais e de lecer.
O sábado, día 20, realizarase unha mostra teatral itinerante por rúas e diferentes espazos patrimoniais de Vilalba, coa que se porá o peche a unha semana "de convivencia na que primará o intercambio cultural".
"Esta é a primeira edición, pero esperamos que perdure no tempo e que vai a máis", conclúe Iria Azevedo.
