Mari Carmen Vázquez acudiu ao cuartel de Vilalba presentar unha denuncia por violencia de xénero en xuño, tras a que se detivo ao seu marido, Manuel Vázquez, co que iniciara os trámites de divorcio. A vítima sufría, segundo fontes consultadas, malos tratos psicolóxicos desde había tempo, pero non hai constancia de agresións físicas previas.
A xuíza, unha vez escoitadas as partes, concedeu a Mari unha orde de afastamento que prohibía a Manolo comunicarse con ela ou achegase a menos de 300 metros. El abandonou entón o que fora o domicilio familiar durante os seus 21 anos de matrimonio e instalouse na casa da súa familia en Nete. Pero non soubo aceptar este cambio na súa vida, non asimilou a separación e nalgún momento entre o sábado e o domingo, regresou á casa, supostamente matou á súa muller no garaxe e aforcouse.
A familia de Manolo preocupouse ao non ter noticias del e na noite do sábado presentou unha denuncia por desaparición. O pai de Mari, que tamén reside en Vilalba, adoitaba falar con ela a media mañá. Ao parecer fíxoo o sábado, pero o domingo, ao non conseguilo, preocupouse e acudiu á casa, tamén sen resposta. Alertou á Policía Local e descubriuse o tráxico crime.
Este martes, ás 18.00 horas, terá que enterrar á súa única filla, que xa é velada no Tanatorio de Vilalba e recibirá sepultura en Sancovade. Farao arroupado por quen mostraron a súa repulsa a un novo asasinato machista, un triste consolo para a perda de Mari, que non tiña fillos. Os restos mortais de Manolo foron xa trasladados ao tanatorio Azahar e a súa familia decidiu despedilo na intimidade, profundamente apenada polo ocorrido.
