É UNHA CASA DE pedra de principios do século XX que podería pasar desapercibida para o visitante. Con todo, sorprende a todo o que cruza a súa porta de madeira. Ao pé da estrada xeral que atravesa Feira do Monte, o edificio rehabilitado do que foi o antigo cuartel ofrece unha viaxe ao ceo pero sen mover os pés da terra. O Museo das Aves de Cospeito, case un descoñecido ata agora, é unha pequena xoia escondida que pretende alzar o voo para converterse nun referente do turismo ornitológico e ambiental.
Nun interior pensado para espertar os sentidos, o son dos paxaros e algunhas ras saúdan ao visitante, que de golpe entra nun verxel sen sabelo. As antigas columnas de madeira do inmoble -e as novas que se colocaron na reforma- simbolizan troncos de árbores con ramas que crecen nun bosque cheo de animais que descubrir.
Na recepción do museo, a mascota, un pequeno pato, dá a benvida ao que chega e ofrece información sobre o Concello, a Reserva da Biosfera Terras do Miño á que pertence e sobre un mundo de humidais que un pode incluso pisar ao entrar. Unha proxección interactiva representa no chan do museo a Lagoa de Cospeito, con peixes que corren dun lado ao outro escapándose entre os pés do que camiña sobre a auga, pero sen mollarse.
Os ollos habitúanse á escuridade das instalacións, que obriga a fixar a mirada no importante. E desde alí, as pisadas amarelas dunha ave percorren e serven de guía nun local no que os paneis informativos sobre os distintos tipos de paxaros, os ovos, os niños, os segredos da cadea trófica, os métodos de reprodución ou a evolución das especies -destaca un que fala sobre o primeiro fósil de ave que se atopou con 150 millóns de anos en Baviera- mestúranse cunha variedade de pantallas interactivas táctiles.
Hai unha pantalla sobre os tipos de voo -o soño de Ícaro no mundo animal-, outra sobre ovos, niños e reprodución, unha máis cun mapamundi que marca as rutas das principais migracións das aves e outra, a favorita de moitos, que identifica as imaxes de cada paxaro cos seus cantos, a través dun altofalante que cae do teito e invita a viaxar a lugares ou recordos. Aí cada oído ten a súa experiencia.
Unha máis ofrece unha visita interactiva Lagoa de Cospeito, a través de prismáticos verdes que ao pulsalos agrandan o mundo animal. Unha ardilla, unha ra ou unha nutria móvense ante os ollos, que con mirada de submarinista, tamén poden mergullarse baixo a auga e nadar entre os peixes.
A visita en primeira persoa sempre funciona. E no Museo das Aves un non pode voar, pero case. O photocall é outro dos éxitos entre os visitantes, que se poden fotografar á beira dunha mascota, sobre a lagoa, subidos a un ganso, dentro do pico dunha aguia -unha das máis solicitadas- ou agarrado ás patas dun voitre.
É o recordo dunha visita que dura ao redor de media hora para un grupo de dez persoas e sempre finaliza co visionado dun vídeo sobre os humidais chairegos. Proxéctase nunha pequena sala, con troncos como asentos, que manteñen a imaxe do bosque que o envolve todo.
«A xente cando entra por primeira vez queda alucinada. A mestura entre unha estrutura e unha decoración clásica e a modernidade das novas tecnoloxías funciona. é un museo moi didáctico no que se cumpre iso de que non che deitarás sen aprender algo máis, porque o que entra leva algo, aínda que só sexa unha curiosidade», di César González, un dos responsables de 2xmil, a empresa que xestiona un museo que o Concello quere relanzar dentro dun proxecto máis amplo de turismo, que enlaza a través dunha senda peonil este pequeno tesouro coa lagoa e o centro de interpretación.
Á oferta actual do museo, que abre os fins de semana e inclúe material para uso do visitante como prismáticos ou telescopios, sumarase na segunda planta unha biblioteca ornitológica, unha zona de exposición e un pequeno museo arqueolóxico -un piso máis arriba xa se estreou un albergue municipal-. Todo pensado para complementar a viaxe desde a Lagoa de Cospeito ao ceo.
