Tres vehículos víronse implicados este mércores nun accidente na LU-540 ao seu paso polo municipio de Muras tras atropelar un deles un cabalo. O suceso ocorreu ás 19.45 horas no punto quilométrico 32 da vía que une Viveiro e Cabreiros, ao seu paso pola parroquia muresa do Burgo.
Desencadeouse despois de que un furgón alcanzase ao equino, producindo o impacto soamente danos materiais no vehículo. No accidente estiveron incolucrados outros dous vehículos. Un dos turismos que circulaba detrás levou a peor parte tras chocar co cabalo, xa que, como consecuencia, sufriu unha saída de vía con posterior envorco, o que provocou que o condutor resultase ferido leve.
Segundo o 112, esta persoa implicada no accidente alertou do ocorrido á central de urxencias, desde onde se mobilizou a Urxencias Médicas do 061 e a Garda Civil de Tráfico e informouse tamén aos bombeiros do parque comarcal de Vilalba.
Á súa vez, un terceiro vehículo sufriu danos materiais ao impactar tamén co equino.
