Os veciños da localidade guitiricense de Parga decidiron, nunha asemblea aberta celebrada no Campo da Feira, retomar, un mes logo da última protesta, as mobilizacións para reclamar a reapertura total do consultorio local ante "a falta dunha resposta oficial ás nosas propostas". Así, convocouse para o vindeiro xoves 13, ás 9.30 horas, unha concentración ante este inmoble.
Ese día farase entrega tamén dos escritos de reclamación dirixidos ao Sergas que están a cubrir os veciños, para deixar patentes así os problemas que se están atopando actualmente para conseguir citas médicas no ambulatorio de Guitiriz.
"Estamos nunha situación que xa avisabamos. Pides unha cita en Guitiriz e tarda unha semana e, encima, é para unha telefónica. É unha burla, parécenos unha mingua dos nosos dereitos básicos", asegurou Afonso Losada, da Plataforma Parganonsedivide, á vez que engadiu que estes problemas "non correspóndense ao 100% co peche do consultorio de Parga, pero si se viron acrecentados".
Losada apuntou tamén que nas reunións mantidas coa xerencia do Sergas díxoselles "que non tiñan constancia de queixas ou problemas non centro médico de Guitiriz". "Fanse as reclamacións para que non teñan esa escusa para non reabrir totalmente o consultorio de Parga", dixo.
Na asemblea tamén se abordou a necesidade de que a oficina de Abanca abra todos os días. A entidade trasladou a súa proposta de facelo, pero en horario reducido, de 12.15 a 14.15 horas, algo que non satisfai aos veciños de Parga. Por iso, decidiron presentar escritos individuais na sucursal "esixindo a apertura en horario completo".
