Os veciños da parroquia vilalbesa de Santaballa promoveron a restauración dunha talla barroca, datada do século XVII, de San Miguel Arcángel, a cal formaba parte dun dos retablos laterais da antiga igrexa da localidade e que actualmente se atopaba gardada no almacén da casa reitoral de Vilalba, logo de trasladala desde a de Santaballa cando esta foi adquirida pola liga Santaballesa.
Para acometer a reparación da imaxe, que alcanza os 110 centímetros de alto, os veciños achegaron algo máis de 2.000 euros, un "esforzo económico" polo que o párroco, Juan Pablo Alonso, dá as grazas.
Os traballos para restaurar a talla, que polo paso do tempo e outras actuacións equivocadas había perdido unha das ás, outra da imaxe do demo e a cobertura de prata da armadura, foron realizados por técnicos da empresa Arte Martínez, de Horche, en Guadalaxara, onde se enviou a peza.
Alí, realizóuselle un tratamento completo de antixilófagos para a carcoma, reconstruíronse e repintaron as partes perdidas, retirouse a pintura sobrante e recuperouse o orixinal, deuse unha capa de pan de ouro na cuberta da armadura e púxose un estofado de calidade superior.
A talla de San Miguel Arcángel xa se atopa de novo na igrexa de San Pedro, á espera dunha peana para pola no seu lugar definitivo. "Moi pouca xente acórdase dela. Estaba no retablo lateral da igrexa antiga, que é hoxe o retablo maior da actual e vaise a pór á beira, á dereita", explicou Alonso.
Esta non foi a única actuación no templo santaballés, xa que tamén se restauraron o coro e o campanario, uns traballos que custaron uns 7.500 euros. Ademais, dous voluntarios recuperaron dúas lámpadas antigas de bronce, de mediados do século pasado, que foron adaptadas á tecnoloxía led.
Tamén hai outros proxectos en mente para executar a longo prazo, segundo avanzou o párroco. "Gustaríanos recuperar a contorna do cemiterio antigo e pintar a igrexa", apuntou.
