A plataforma #Parganonsedivide, que se constituirá oficialmente para facilitar a realización dos trámites e xestións derivados da loita veciñal contra o proxecto presentado por Adif para suprimir os pasos a nivel coa construción dun paso subterráneo para vehículos, celebrou este domingo a súa primeira reunión, na que se tomaron diversos acordos.
O primeiro deles foi establecer contactos con expertos na materia para saber canto custaría a elaboración dun estudo, ou incluso un proxecto, que expoña unha alternativa seria e contratastada ao plan presentado por Adif.
Os veciños, que se mostraron moi críticos coa postura da alcaldía, pola que non senten apoiados, continúan firmes na defensa da única opción que ven viable, a construción dunha variante que saque a vía do pobo para non dividilo en dous, o que prexudicaría non só a convivencia no seu día a día, senón a celebración dun dos seus principais recursos, a feira dominical.
Ademais de continuar con accións públicas que dean visibilidade ás súas reivindicacións, queren que as entidades locais sómense á súa causa. Así, a comunidade de montes e o CIT presentarán nas súas asembleas de febreiro unha proposta de apoio. A procura de respaldo tamén inclúe o envío dunha carta á Valedora do Pobo, sen descartar o levar a súa causa ao Parlamento de Galicia, para que este decida se se suma ao rexeitamento ao proxecto de Adif que xa validaron por unanimidade tanto o Concello de Guitiriz como a Deputación.
Nunha próxima reunión da plataforma presentarase o resultado destas e outras xestións, como a consulta a Patrimonio do impacto que terá nos bens protexidos ou catalogados a construción do túnel, xa que este discorre por baixo do actual paso a nivel, desde a Rúa Mestre Francisco ata case a Praza do 28.
