O Grupo de Emerxencias Supramunicipal de Guitiriz ten os días contados. Polo menos tal e como se lle coñece hoxe en día. O 31 de decembro finaliza o actual convenio e o goberno local, co apoio do independente Jesús Veres, xa ratificou nun polémico pleno -PP, BNG e o edil non adscrito abandonaron a sala ao incluírse o punto de urxencia ese mesmo día- o seu propósito de non continuar xestionando un servizo envolvido na polémica.
O último conflito foi cualificado pola CIG como "un feito de extrema gravidade". A central sindical denunciou publicamente e pediu á Dirección Xeral de Emerxencias e á Deputación de Lugo -son as que financian o servizo- que investiguen o ocorrido o pasado 25 de novembro, cando desde o 112 se alertou dun accidente laboral no polígono de Begonte con consecuencias fatais.
"O Ges de Guitiriz non acudiu á alarma", din, asegurando que "non había ningún traballador do GES de garda na base do servizo" e que foi un edil o que respondeu á chamada, sen que se chegasen a mobilizar medios.
Desde a Asociación de Grupos de Emerxencias Supramunicipais de Galicia (Agesga) tamén critican as "malas prácticas" do servizo guitiricense e pregúntanse "quen está de garda os domingos ou quen ten o teléfono para recibir as chamadas das emerxencias?", dado que, segundo eles, ofrecéronse versións contraditorias.
A este respecto, a alcaldesa, Regina Polín mostrou a súa reserva a "opinar" sobre o ocorrido "porque falamos da morte dunha persoa e estase aproveitando de forma lamentable", pero si aclarou que está a investigar para esclarecer que pasou. Aínda así, cre que "o GES non tivo responsabilidade" no sucedido e mantense firme no seu convencemento de que "alguén foi" atender devandito aviso.
O debate chegará incluso ao Parlamento galego, onde En Marea presentou unha proposición non de lei na que inclúe dous puntos específicos sobre o 25 de novembro, pedindo que se abra "unha investigación con respecto á responsabilidade derivada da omisión do deber de socorro por parte da persoa que atendeu a chamada do 112", aclarando se o teléfono estaba na base ou o tiña un edil como afirma a CIG, se había persoal de garda e, de ser así, que facía. Quere saber se existiu "neglixencia na atención do servizo" e, para axudar a esclarecer o ocorrido, reclaman que se revise a gravación da chamada do 112.
O documento presentado por En Marea incide unha vez máis na "inefectividade e a inoperancia deste GES, por falta de medios e por unha nefasta xestión". Recordan así outros cabalos de batalla que derivaron en enfrontamentos e reclamacións entre o goberno local, a oposición, persoal do servizo ou a CIG: as carencias no material -a dotación da base ou a falta de equipos de traballo adaptados- e o persoal -de doce prazas, só hai seis traballadores en activo- e a realización de funcións "impropias", como "limpeza, recollida de lixo e outras tarefas de servizos múltiples". Por todo iso, En Marea pide á Xunta que dote de medios "persoais e material axeitados" aos GES e limite as súas atribucións á atención "única e exclusivamente de emerxencias".
A falta de que se diriman responsabilidades, se as houbese, e a menos dun mes para o cesamento do GES, os outros tres municipios nos que presta servizo, Begonte, Friol e Xermade, teñen sobre a mesa a opción de asumir a súa xestión. Polín avanzou que desde o Concello están dispostos a ceder o material, os medios e incluso a base. "Teñen de todo", asegurou, reafirmándose nas razóns da súa renuncia: as dificultades para cubrir as prazas, a existencia de informes desfavorables de intervención, "por ser un servizo que non lle compete ao Concello", e a procura de "solidariedade", posto que desde que o GES púxose en marcha en 2013, a pesar de servir a catro municipios, Guitiriz sempre foi a sede.
