Un incendio danou este sábado parte dunha casa deshabitada na parroquia de San Simón da Costa, en Vilalba. Nun principio crese que o lume se puido iniciar nun alpendre anexo á vivenda, no que hai unha lareira, e deste este saltou á cuberta da construción principal, cuxa estrutura é de madeira.
A central de urxencias do 112 recibiu o aviso pasadas as tres da tarde e mobilizou os bombeiros do parque comarcal de Vilalba, que traballaron durante tres horas nos labores de extinción. O seu labor centrouse en controlar o lume para que non afectase a todo o inmoble, pero non puideron evitar que os danos sufridos acabasen por provocar a caída dunha parte da cuberta, o que afectou ao primeiro piso, que tamén se afundiu ata o baixo.
Aínda que a casa non está habitada, os seus donos acoden ao lugar con frecuencia, tal e como fixeron este venres. Ata o lugar do suceso, xa cerca do límite co municipio de Ababín, tamén se desprazaron o servizo municipal de intervención rápida e axentes da Policía Local de Vilalba e da Garda Civil.