Unha trintena de autocaravanas chegaron este domingo ao Viveiró, en Muras, para estrear a nova área impulsada dende o Concello co obxectivo de dinamizar e atraer turismo á zona.
Os visitantes, membros da Asociación Galega de Autocaravanistas, chegados principalmente de Galicia pero tamén doutros lugares como Toledo ou Ponferrada, destacaron o entorno deste novo espazo, ubicado nas inmediacións da antiga unitaria do Viveiró.
"La zona está muy bien, la ubicación es espectacular. Es un entorno paradisiaco y un buen lugar para relajarse o practicar senderismo", expresou Sindo López, da directiva da asociación. As instalacións nesta nova área de autocaravanas do Viveiró, que contan cun xardín, merendeiro e aseos públicos, ademais de zona de vaciado de augas negras, reforzaranse cun párking na área recreativa da Veiga, na capitalidade de Muras, onde os vehículos tamén poderán facer parada.
O programa da inauguración, no que estiveron presentes o alcalde de Muras, Manuel Requeijo, e o tenente de alcalde, Mario Rouco, contou con varias actividades. As primeiras caravanas chegaron dende primeira hora da mañá e ás 10.30 horas realizouse a apertura oficial das instalacións.
Ás 12.00 horas, un grupo de autocaravanistas participaron nunha vista guiada polos cruceiros do municipio, da man de Mario Saavedra, do Grupo Carboeira, que repetiu excursión con outro grupo diferente pola tarde. Para hoxe está prevista outra saída guiada pola Ruta do Xistral, da man de José Areás.
