A UD Ourense deixou tocado e un pouco máis afundido aínda ao CD As Pontes, ao que superou pola mínima no partido da décimo sexta xornada de Liga de Terceira, disputado baixo unha intensa choiva no Poboado.
Con esta nova derrota, os ponteses non só non saen do descenso, senón que se afunden aínda máis nel, tras lograr só 13 dos 48 puntos posibles no que vai de competición.
Nesta ocasión, o conxunto visitante foi lixeiramente superior durante os primeiros 45 minutos, nos que dispuxo de varias oportunidades de adiantarse no marcador.
No minuto 12, Javi Liz salvou ao As Pontes cunha brillante parada tras un cabezazo de Hugo e, no 34, foi Alfredo o que puxo entre as cordas ao conxunto azulón tras estrelar contra a barreira unha falta dentro da área por cesión perigosa.
Finalmente, chegouse ao descanso do choque co 0-0 inicial, o que deixou abertas todas as opcións dos locais de conquistar unha nova e necesaria vitoria no seu territorio. Pero esta nunca chegou.
No segundo período, a UD Ourense logrou o único tanto do encontro en torno ao minuto 60. Fíxoo nunha xogada que se iniciou nun saque de banda. Iago Branco recibiu un centro na área e a súa remate cruzado acabou coándose ata o fondo da rede tras toparse primeiro co poste.
Os locais intentaron entón buscar desesperadamente o empate, pero quedou demostrado unha vez máis que están limitados de efectivos de medio campo para arriba, polo que foron os pupilos de Currás os que tiveron as ocasións máis claras para sentenciar.
Nos minutos 85, 88 e 89, Champi, Arce e Marquitos, respectivamente, puideron matar o partido con contragolpes que non acabaron de milagre en gol.
O CD As Pontes tratará de volver á senda da vitoria, logo de sumar dúas derrotas consecutivas, nunha complicada visita ao Estradense, que se mide hoxe ao Somozas, e que polo momento suma un total de 17 puntos, só catro máis que os ponteses.
