Os Tedax desactivan en Baamonde unha granada de morteiro antiga

O grupo de Técnicos Especialistas en Desactivación de Artefactos Explosivos (Tedax) da Garda Civil en Pontevedra desprazouse este luns á localidade chairega de Baamonde, no municipio de Begonte, para desactivar unha granada de morteiro que atopou hai uns días un veciño da zona nunha leira.

A localización final do artefacto explosivo, xunto ao atrio da igrexa parroquial, xurdiu da casualidade de que a persoa que atopou o obxecto topouse alí sobre as dúas da tarde cunha patrulla da Garda Civil, á que estaba buscandou tras non conseguir localizar a ninguén nese momento no cuartel da localidade para facer entrega do seu achado.

Unha vez explicada a situación, os axentes indicáronlle que depositase con coidado a granada no muro que rodea a igrexa e, a continuación, procedeuse a acordoar a zona —un tramo duns 30 metros da vía que vai desde a Nacional VI a Casa Museo de Víctor Curral— para manter un perímetro de seguridade á espera da chegada dos artificieiros.

Primeiro, acudiu un técnico chegado de Lugo, que tras analizar o artefacto comprobou que este se atopaba cargado, polo que se deu aviso aos Tedax. Estes chegaron ao lugar pola tarde, sobre as 18.30 horas, recolleron o obxecto e trasladárono a un sitio seguro para estouralo, segundo indicaron fontes da Garda Civil. Engadiron que a granada se atopaba en moi mal estado e que todo apunta a que pode proceder da época da Guerra Civil española. 

"Collémola e levámola para casa. Mal feito, porque tiñamos que avisar á Garda Civil daquela"

Este incidente xerou moita expectación na zona, principalmente cando se empezou a acordoar a rúa e a granada atopábase aínda á vista de todos. Posteriormente, e para evitar a aglomeración de xente na vía pública, apartouse un pouco o obxecto e ocultouse entre uns sebes. 

O veciño que atopou o artefacto explosivo, Carlos Pedreira Rodríguez, explicou o periplo que realizou nos últimos días con el, á vez que recoñeceu que a súa actuación non estivo ben, pero que "o descoñecemento ás veces faiche cometer imprudencias".

RELATO. E é que este begontés do barrio de Carballido, na parroquia de Pacios, topouse coa granada buscando o marco dos lindes dunha leira. "Apareceu á beira do marco, nun montículo cuberto cunha pouca maleza e terra, a unha profundidade duns 40 centímetros. Collémola e levámola para casa. Mal feito, porque tiñamos que avisar á Garda Civil daquela", explica. 

A zona na que apareceu está preto dunha capela que hai no barrio, polo que discorre o Camiño Norte de Santiago, e está xunto a unha vía de servizo agrícola. 

Cando a collemos xa nos deu a impresión de que estaba cargada, polo que pesaba e porque non tiña orificio de saída"

Carlos Pedreira describiu o obxecto como unha bala grande, de uns 30 centímetros de longo por uns dez de ancho e de entre tres e catro quilos de peso. "Cando a collemos xa nos deu a impresión de que estaba cargada, polo que pesaba e porque non tiña orificio de saída. Despois o meu fillo estivo a mirar en internet, buscando información, e vimos que non tiña as espoletas abertas", sinala.

A partir de aquí, este begontés intentou en varias ocasións depositar o artefacto no cuartel da Garda Civil de Baamonde, pero cando acudía non atopaba a ninguén. Finalmente este luns ao mediodía púxose a buscar aos axentes polo pobo e atopounos "facendo patrulla xunto á igrexa". 

"Baixeime do coche e expliqueilles a situación e dixéronme que a colocase no muro con coidado e xa me explicaron que o que tiña que facer era chamar á Garda Civil no momento que a atopei e non movela do sitio", explicou Carlos, lamentando cometer unha imprudencia "por descoñecemento". 

Afortunadamente, non houbo que lamentar ningún tipo de dano neste peculiar periplo da granada de morteiro aparecida en Pacios —segundo o seu descubridor, a primeira da que se ten coñecemento na zona—. Posiblemente o mal estado no que se atopaba tras o paso de oito décadas fixo que o seu perigo non fose tan elevada, aínda que ante estes artefactos debe primar a precaución.