Un lobo provocou un accidente de tráfico este mércores pola tarde na LU-540 á altura do termo municipal de Muras, aínda que o condutor resultou ileso.
O home, que circulaba pola vía ás 20.30 horas, impactou co seu vehículo contra o animal, que quedou tendido na estrada. Ante a falta de luz o home non era consciente de que animal se trataba, se era un can ou un lobo, ou se aínda estaba con vida.
Nese momento, unha patrulla da Garda Civil que pasaba pola zona encargouse de regular o tráfico e cando se achegaron ao animal viron que era un lobo. Segundo algunhas testemuñas, o animal levantouse, con visibles feridas nas patas traseiras, e arrastrouse cara á maleza, desaparecendo tras ela.
