Os bombeiros do parque comarcal do Eume acudiron a sufocar un incendio que se rexistrou nunha cheminea dun local de hostalería das Pontes, onde grazas á rápida intervención dos seus propietarios o suceso non provocou danos maiores.
Foron precisamente eles os que, ao redor das 17.00 horas, deron aviso ao centro de urxencias do 112 Galicia e os que baleiraron un extintor para apagar as chamas que se iniciaron na cheminea. Posteriormente desprazáronse ata o negocio, situado na céntrica Avenida de Ferrol, varias dotacións dos bombeiros que estiveron a traballar durante aproximadamente dúas horas.
Ata o lugar do suceso acudiron tamén a Policía Local das Pontes e membros da agrupación de voluntarios de Protección Civil.