O director xeral de Enerxía e Minas, Ángel Tahoces
Tahoces, acompañado de José Manuel Balseiro e outros representantes da Xunta e da Fundación Sotavento, recordou que ademais da produción eólica, o parque desenvolve un importante labor en materia de investigación, sensibilización e formación.
A súa contribución á difusión das enerxías renovables fíxoo merecedor da declaración, por parte da Unesco, como unha experiencia de boas prácticas, unha das 32 recoñecidas no mundo, segundo puntualizou Tahoces, incidindo en que todas estas razóns, así como os diferentes proxectos de innovación que se levan a cabo nas instalacións, son motivos para sentirse "orgullosos" de Sotavento.
Así llelo transmitiu aos encargados de inaugurar o programa deste ano, os alumnos do máster de Dirección de Actividades da Natureza da Facultade de Ciencias da Educación de Lugo, que asistiron á charla de Tahoces e á presentación da exposición que poderá verse no parque ata finais de ano.
Mare plasticum, dos químicos Margarita Cimadevila e Wolfgang Trettnak, é unha mostra creada con lixo recollido nas praias e que busca denunciar a contaminación de mares e océanos e o dano que esta produce.