Sos estamos, sos quedamos é a rechamante lema que aparece, xunto un lazo negro, nun cartel que calquera viandante ou visitante pódese atopar en preto dun centenar de escaparates e portas de establecementos comerciais do centro histórico e a coñecida como Xeral -Rúa da Pravia e Rúa Galicia- de Vilalba. Para os seus propietarios, é a xeito de mostrar o seu descontento e a súa preocupación por varias medidas que está a levar a cabo o Concello, como o cambio de localización de postos na feira e o feirón ou a supresión de zonas de aparcadoiro no centro.
Esta última é a queixa máis xeneralizada, xa que mentres na zona da Praza de Santa María móstranse contrarios á iniciativa do goberno municipal de peonalizar a zona, nas dúas rúas principais da localidade o problema que apuntan é a colocación de xardineiras para ampliar as terrazas de locais de hostalería, reducindo a zona onde aparcar.
"Se non temos aparcadoiro, a xente vaise a outro pobo a comprar. Vilalba vive das parroquias, de xente que vén en coche, moita dela maior, á que hai que dar facilidades", apuntan os comerciantes do casco antigo.
O proxecto de peonalización da Praza de Santa María e a instalación de xardineiras nas rúas principais para ampliar terrazas preocupan un sector que vive das parroquias
Piden que, de levarse a cabo a peonalización en Santa María, habilítense primeiro outras opcións para que haxa tamén zonas de aparcadoiro no centro. "Peonalizar é algo que hai que mirar moito e non quitar o aparcadoiro de golpe. Este non é un pobo de turismo, senón de servizos. Se morre o comercio, morre o pobo", insisten.
Por parte dos comerciantes das rúas principais, explican que a peonalización ocasional da Rúa da Pravia -en San Ramón e fin de ano- supúxolles eses días unha importante baixada nas vendas e veno como unha proba do que pasaría se se seguen reducindo as zonas para estacionar.
No caso dos negocios do centro histórico, tamén reclaman que se dinamice a zona baixando ao centro de novo os mercados semanais e aumentando os postos os días de feira, porque o cambio de varios dos que había nas prazas Santa María, Coronel Pena e incluso todos os da Constitución para a zona do campo da feira fai que a afluencia de xente no centro sexa moito menor.
"levaron os animais (coellos, galiñas...) para arriba por normativa, porque non poden estar xunto a postos de alimentación, e dixeron que baixarían estes para o casco antigo e non foi así. Sentimos enganados", aseguran.
