Tres emprendedoras fincadas en Lugo impulsan o proxecto Avime Fogar, unha casa comunitaria para persoas maiores na parroquia cospeitesa de Támoga, que prevé abrir as súas portas o próximo mes de outubro.
Montse González, responsable desde hai case unha década da empresa de axuda a domicilio Avime, uniu forzas con dúas antigas empregadas e compañeiras, Teresa Díaz e Marisa Ansoar, ambas cunha longa traxectoria no sector, para darlle forma a este proxecto de atención a persoas maiores. O seu obxectivo é ofrecer un trato "familiar e personalizado" aos seus futuros usuarios, nunha antiga casa de aldea completamente rehabilitada, localizada enfronte da igrexa parroquial.
A iniciativa xurdía hai xa seis anos, pero os trámites e pasos que tiveron que dar foron demorando o que está a piques de converterse en realidade. Ningunha tiña relación previa con Támoga, pero a súa contorna rural, a súa proximidade a Lugo e a dispoñibilidade da casa e a leira —o terreo ten case 2.000 metros cadrados—, propiedade dun amigo que ademais asumiu a rehabilitación, fíxoas decantarse por ela.
A pesar de non ter que preocuparse pola restauración, aseguran que os seus gastos roldan xa os 40.000 euros, pois si deben custear todo o equipamento da vivenda para poder poñela en funcionamento como casa comuntaria.
"Hai demanda para este tipo de servizos", explican as promotoras, que xa recibiron algunha consulta —pódese solicitar máis información chamando ao 637.83.65.83— interesándose polo seu proxecto.
A casa comunitaria Avime Fogar ofertará un total de doce prazas de residencia e para prestarlle atención aos usuarios contarán cun persoal de cinco persoas, nas que se inclúen elas mesmas. Ademais, prevén contar co respaldo de persoal externo se é necesario para as sesións de fisioterapia ou para a realización de diversas actividades diarias e talleres, excursións ou xogos.
"Queremos ofrecer un servizo de calidade, para que os nosos usuarios se sintan coma se estivesen na súa casa", aseguran as promotoras de Avime Fogar, adiantando que tamén serán moi flexibles co horario de visita dos familiares.
Dúas habitacións dobres e cinco individuais
Baixo e piso
Na planta baixa, ampliada nuns 90 metros cadrados coa construción dun inmoble contiguo, hai tres dormitorios, baño, oficina, cociña, despensa e comedor. O primeiro piso repártese entre as catro habitacións restantes, un baño e lavandería.
Alpendre e leira
No exterior restaurouse un antigo alpendre, en cuxa entrada hai un forno —queren cocer pan—, que se usará como comedor ou salón de actos. A leira que rodea o edificio aproveitarase para ter unha horta, un invernadoiro e incluso animais.
