Varios alumnos do IES Lois Peña Novo de Vilalba, do primeiro curso de Mantemento de Vehículos e de segundo de Informática de Oficina, acaban de desenvolver o proxecto Vixía, un sistema eCall dispoñible para todo tipo de vehículos, a través de Arduino.
Deste xeito, non só os automóbiles deseñados a partir de abril de 2018 disporán do mecanismo de chamada de urxencia automática, senón que calquera coche poderá instalar o dispositivo.
Segundo explica Marta Diz, a coordinadora dos alumnos de informática -que tamén desenvolveron a web-, Vixía consiste nun botón que, ao ser pulsado, ponse en contacto coa central de urxencias do 112 -aínda que nas probas chaman a un móbil, para non ocupar a liña de urxencias-. Complétase con altofalantes e un micrófono polo que o usuario pode escoitar e falar co seu interlocutor, en caso de estar consciente. Se o condutor ou os ocupantes do vehículo non puidesen comunicarse, o sistema eCall envía a localización exacta, así como o número de bastidor do coche accidentado.
Pola súa banda, os alumnos de mecánica, que contaron coa axuda dos profesores Jesús Ángel Iglesias, Pablo Quintela e Manuel Cancelas, foron os responsables de instalar o dispositivo no coche, cedido por un despezamento e preparado no centro educativo.
Todos os docentes implicados coinciden en que o máis positivo do proxecto, enmarcado no plan Lanzadeiras do Eduemprende da Xunta de Galicia, co apoio da fundación Alcoa, é "que aprendan a traballar en equipo e a emprender", xa que a idea de negocio conduce a dúas direccións: a venda a particulares ou a venda a talleres concertados de Galicia para que instalen o sistema.
