Serfuja acaba de terminar coas obras de modernización do seu tanatorio de Castro de Ribeiras de Lea, aberto desde 1998. Os traballos consistiron na renovación das súas instalacións, incluíndo mobiliario e tecnoloxía, ademais da optimización de espazos.
A intervención, a de maior envergadura levada a cabo pola compañía lucense nos seus 22 anos de historia, centrouse no pintado e a mellora de zonas comúns do tanatorio e das salas que ocupa cada familia, nas que se renovaron teitos, chans e túmulos.
Ademais, reestruturáronse espazos para gañar en confortabilidade en áreas como a oficina, a cafetería ou o office, instalouse mobiliario novo e incorporáronse pantallas, entre outra tecnoloxía.
O proxecto de renovación, que tamén se reflicte na zona da capela, dálle continuidade á luminosidade e a transparencia que se aprecia nas instalacións que Serfuja inaugurou en 2016 no polígono das Gándaras de Lugo.
"Do que se trata é de impulsar a presenza de luz e de buscar espazos máis diáfanos para que as familias se sintan o máis cómodas posibles nun momento de dor", explica o seu xerente, Jorge Balado, indicando que as obras tamén buscan o confort "das persoas queridas que acoden ao tanatorio como do propio persoal", integrado actualmente por unha vintena de traballadores.
