Segundo Pérez, malia ao seu amplo quefacer como deán da Catedral de Santiago, segue a reservar tempo para unha das súas grandes paixóns, a investigación. Froito dese traballo de inmersión na riqueza dos arquivos eclesiásticos xorde Unha visita á Terra de Parga en 1613, obra na que recupera un tema que abordou na súa tese de doutoramento e en artigos publicados en Estudios Mindonienses. O libro, editado por Xerion, conta con dúas partes diferenciadas, unha primeira na que se analiza a visita, as parroquias do arciprestado de Parga e a acción pastoral desenvolvida nelas, e unha segunda na que se transcribe o manuscrito redactado polo secretario da visita.
De onde xorde a idea de facer este libro?
Xunto coa investigación teolóxica sempre tiven moito interese pola historia local. Por iso escribín un libro sobre a parroquia do Buriz, outro sobre a historia da escola habaneira dos Vilares e diversos artigos sobre a zona de Parga. Nunha pescuda no Arquivo Diocesano de Mondoñedo, fai xa moitos anos, fixen unha cata sobre as visitas pastorais da diócese e atopei o texto desta visita, que me pareceu que merecía a pena dalo a coñecer.
Como foi ese proceso de documentación? Levoulle moito tempo preparar a publicación?
O manuscrito está no Arquivo da Catedral de Mondoñedo e sobre este tema hai pouco publicado en Galicia. Si que me levou moito tempo, xa que despois da transcrición estivo parado ata que agora lle tocou a quenda.
O manuscrito gárdase no Arquivo da Catedral de Mondoñedo e sobre este tema hai pouco publicado en Galicia
Que foi o que máis o sorprendeu durante a investigación?
Sorprendeume a descrición que fai do chamado arcedianato de Montenegro onde se describe minuciosamente a situación de cada parroquia. Confirmoume na miña teoría do pouco poboada que estaba esta zona ata o século XX.
Quen era o bispo Mesía de Tovar?
Era un bispo que foi mandado a Mondoñedo para aplicar o Concilio de Trento. Parece que non foi moi querido e só foi promocionado á diocese de Astorga, onde fixo un gran traballo pastoral.
Transcribe o texto da visita pastoral, que permite descubrir da época?
É un texto apaixoante, xa que encende unha luz para entender a nosa microhistoria, sen a que non pode entenderse o futuro. Un futuro sen raíces é un círculo pechado sobre si mesmo.
Que cre que queda hoxe daquela Parga?
Ata fai pouco quedaba case todo, pero imos camiño de que non quede case nada. Por iso é preciso meter no amor á terra os nosos nenos e mozos ata o máis fondo do seu corazón.
Teño pensado outro libro sobre escritos xacobeos e moitos artigos que non sei se Deus me derá tempo a rematalos»
Carlos García Cortés escríbelle o prólogo, por que el?
Carlos García Cortés é un dos autores que máis ten publicado de historia local en todo Galicia, compartimos ensino durante moitos anos e conservamos unha boa amizade. É un prólogo que merece a pena lelo.
Tamén vén de publicar A Diócese de Mondoñedo vista polos seus bispos, que razóns motivaron esta obra?
Este libro é unha parte do traballo que realicei no Arquivo Secreto Vaticano durante máis de 20 anos e que quere ser a miña contribución a poñer en valor a memoria histórica e pastoral da Diócese de San Rosendo.
Ten xa outro proxecto en mente?
Teño pensado outro libro sobre escritos xacobeos e moitos artigos que non sei se Deus me dará tempo a rematalos.