Varios mozos, que utilizaban unha casa familiar de Ponte de Outeiro, en Castro de Rei, como local de ensaio dun grupo musical que estaban a crear denuncian que estes días lles roubaron numerosos instrumentos e equipos de son.
"É unha casa familiar dun dos compoñentes pero alí non vive ninguén. Queda algo apartada, o que nos viña ben para tocar, e tiñamos alí case todo. Menos as guitarras eléctricas, que as levamos para a casa para ensaiar, levaron todo", explican, e enumeran unha longa lista que aínda non pecharon.
"Amplis, unha batería, micrófonos, mesas de mestura, un teclado, varias guitarras acústicas, bafles...", enumeran, pero recoñecen que non saben aínda a canto ascenden os danos porque aínda están a recompilar todo o que tiñan na vivenda.
"Estamos a catalogar, non era todo súper bo, pero son moitos cartos", din. E engaden: "Era un grupo que estabamos formando, máis para pasalo ben entre amigos que outra cousa, e xa amoláronnos, pero o grupo seguirá", din tirando de humor, aínda que teñen claro que "diso xa non aparece nada".
Os axentes instáronos a pór a denuncia no cuartel, unha vez que identifiquen todo o que falta, ao longo do día de hoxe
Os mozos chairegos, que puxeron os feitos en coñecemento da Garda Civil, tampouco saben con exactitude cando se cometeu o roubo, xa que na última semana ningún deles foi pola vivenda na que ensaiaban desde que se xuntaron.
"Enterámonos o sábado porque o dono da casa foi por alí e xa se encontrou con que levaran todo", explican. E ese mesmo día varios axentes da Garda Civil acudíronse na vivenda, onde comprobaron que a porta da entrada estaba forzada.
Os axentes instáronos a pór a denuncia no cuartel, unha vez que identifiquen todo o que falta, ao longo do día de hoxe.
Na vivenda, á parte dos instrumentos e os equipos de son que roubaron, non botaron en falta nada máis, en principio. "Pero tampouco hai moito máis para roubar, aparte dos mobles", explican.
