O Concello de Ribeira de Piquín revaloriza a súa paisaxe coa adecuación do miradoiro de Barangón, unha obra que se suma á homologación previa de tres rutas de sendeirismo para promover o turismo e que pretende converterse nun novo reclamo para o municipio.
"Era unha zona inaccesible e pouco aproveitada porque é, dentro das zonas máis altas do municipio, o punto dende onde se ten unha visión máis longa", explica o alcalde de Ribeira de Piquín, Roberto Fernández Rico, que asegura que a vista chega desde o miradoiro de Barangón a Asturias ou incluso ás Pontes.
A actuación, á que se destinaron ao redor de 32.000 euros -o 65% correspóndese cunha subvención da Xunta, a través de Turismo de Galicia-, inclúe a colocación dunha nova estrutura de madeira, con bancos integrados e un espazo de descanso que permiten observar a paisaxe con comodidade. Ademais, habilitouse unha zona de aparcadoiro e melloráronse os accesos, para o que houbo que realizar traballos de limpeza e rozas. O proxecto, ademais, complétase cun panel informativo que axuda a recoñecer ao visitante o que ve.
O Concello homologou tres rutas de sendeirismo no municipio, mellorou as áreas recreativas de Chao do Pousadoiro e A Retorta e as zonas fluviais, no Eo e o Rodil
"Xa foi moi visitado dende que se rematou a obra, xa veu unha chea de xente preguntando ao Concello", valora o rexedor de Ribeira de Piquín, que ve no miradoiro de Barangón un novo "reclamo turístico" e, sobre todo, un "complemento" a outras actuacións que xa se acometeron.
O Concello homologou tres rutas de sendeirismo no municipio -a Eo-Pena de Milleiros, con 12,4 quilómetros, e Pena dos Portelos e Chao do Pousadoiro-Muíño de García, ambas duns catro quilómetros- e realizou actuacións de mellora nas áreas recreativas, tanto no Chao de Pousadoiro como na Retorta, así como nas zonas fluviais, con limpezas no río Eo e o Rodil.
"O proxecto que temos agora é acondicionar a estrada dende Piquín a Barangón para poder promover o miradoiro turisticamente", explicou Fernández Rico, que indicou que están a estudar a canto ascendería o orzamento da obra, nunha vía que ten algo máis de catro quilómetros e que esperan poder mellorar ao longo do próximo ano.
