O Concello de Ribeira de Piquín acometerá obras para rehabilitar dúas antigas escolas unitarias, concretamente a de Navallos e Santalla, ambas hoxe en desuso e en mal estado. O obxectivo do goberno local é habilitar espazos para os veciños e ao mesmo tempo poder ofrecer vivendas de urxencia social, un servizo do que actualmente non dispón o concello.
"A idea é facer o mesmo nas dúas escolas respectando as construcións iniciais. Proxectamos facer locais sociais na planta baixa, onde estaban as propias escolas, e vivendas na planta alta, onde xa estaban as casas dos mestres", explica o rexedor de Ribeira de Piquín, Roberto Fernández Rico.
As obras contan cunha axuda do 70% do GDR 3 e teñen que estar executadas antes de setembro de 2019. á antiga escola de Navallos, a que require un maior investimento, destinarase un orzamento total de ao redor de 60.000 euros.
"Hai que reformar todo, fachadas, interiores, ventás...", explica o rexedor, que indica que no caso da unitaria de Santalla o orzamento recórtase porque o tellado xa se restaurou cunha subvención da Deputación de Lugo. En total, a esta actuación destinaranse uns 40.000 euros.
"Aproveitamos a distribución que xa teñen e así podemos ofrecer vivendas para emerxencias sociais, para xente sen recursos, cun problema concreto... Non había ningún local habilitado no concello para ningún tipo de emerxencia e cremos que é un servizo moi importante", confirma Fernández Rico, que explica que a idea de ofrecer as antigas unitarias en aluguer como fan noutros concellos é algo que, en principio, non barallan.
OUTRAS OBRAS. O Concello de Ribeira de Piquín, ademais, xa acometeu melloras nas inmediacións da escola de Navallos, onde habilitou un campo da festa. Esta actuación enmárcase dentro dunha partida de preto de 80.000 euros que o goberno local destina á execución de dúas obras de alquitranado, financiadas a través do Plan Único da Deputación.
Esta actuación, que incluíu o alquitranado da chaira situada entre a antiga escola de Navallos e a igrexa parroquial, tamén serviu para mellorar con alcatrán a estrada no núcleo de Cabaceira, na parroquia de Santalla, para executar obras no acceso aos depósitos de auga municipais de Chao do Pousadoiro, Esqueira e Navallos.
"O do campo da festa foi unha petición veciñal e era algo importante. Teñen unha asociación que funciona xenial en Navallos, é moi dinámica", valora o rexedor de Ribeira de Piquín.
