Unha ducia de alumnos do primeiro curso de FP Básica de Informática e Oficina do IES Lois Pena Novo de Vilalba centraron o seu proxecto para o programa Lanzadeiras Lugo —dentro do plan Eduemprende da Xunta de Galicia, en colaboración coa fundación Alcoa e El Progreso— na reutilización de materiais, sobre todo os relacionados con aparellos electrónicos e informáticos.
Tal e como explica a súa coordinadora, Fina Paulos, trátase dunha miniempresa creada co obxectivo de vender os dispositivos creados a base "da reciclaxe e a reutilización de compoñentes electrónicos que conseguimos nos puntos de recollida que colocamos, ademais de computadores, teclados ou discos duros que nos foron chegando".
De aí naceron multitude de ideas. Teclas e membranas de teclados, disquetes, ratos, carcasas de discos duros, placas base, microprocesadores ou CDs son os novos lapiceros, blocs de notas, chaveiros, marcos de fotos, artigos de decoración e todo tipo de bixutería. Decenas de dispositivos que levaron á exposición FP Innova, celebrada en Santiago de Compostela, na que causaron sensación entre os presentes.
Para conseguilo, botaron man dos seus compañeiros de Electricidade, "para soldar", e dos de Ciencias Aplicadas "para abordar o tema da reciclaxe, dos compoñentes de cada produto e da economía circular", comenta Fina Paulos, quen tamén engade que cre que "se fixo un bo traballo, estes rapaces traballaron con ferramentas que, doutro xeito, posiblemente nin tocasen".
O programa Lanzadeiras está impulsado pola Xunta, en colaboración coa fundación Alcoa e El Progreso de Lugo
Algúns alumnos destacan entre as aprendizaxes que recolleron ao crear a miniempresa o "descubrir o interior dos materiais cos que traballamos e a súa montaxe". Outros, en cambio, quedan "coa creación da web", afirmaba Tania Ocampo quen, xunto a Andrei Creanga, deu forma a www.tecnolife.gal. Na páxina pódense visualizar os produtos e o seu proceso de creación, ademais de contar cun vídeo da reciclaxe, do que se encargou Tania.
Logo de cinco meses de traballo, os integrantes de Tecnolife coinciden na "boa experiencia" e na "satisfacción" co resultado final.
Outras edicións
Este é o terceiro ano que participa o centro vilalbés. Farao con catro proxectos —Vixía, Parking Solucións, Rede Activa e Tecnolife—, logo de gañar o primeiro premio en Electricidade en 2017 e dous galardóns o ano pasado.