A quinta campaña no castro de Saa, na parroquia pastoricense de Baltar, chega ao seu fin tras un mes de traballos e logo de recuperar parte dunha vivenda dunha "arquitectura absolutamente desenvolvida da época galaico-romana", tal e como indica o director das escavacións, Emilio Ramil.
A construción, que xa empezou a descubrirse nas escavacións do ano pasado, é unha vivenda de tres estancias -polo menos polo momento, porque aínda non está enteira- e a construción dos muros, de 70 centímetros de ancho, indica que posiblemente houbo un piso superior.
"Estamos nun momento de arquitectura galaico-romana moi desenvolvido", di Emilio Ramil, que viaxa ao pasado polo empedrado exterior da vivenda e entre os muros dun gran patio, que "é como un vestíbulo" e que comunica con outras dúas estancias.
A ocupación do xacemento durou 500 anos
Unha das dúas habitacións, debuxa o arqueólogo entre os achados mentres camiña á dereita, era unha "zona doméstica de cociña e produción de alimentos", onde se situaba "unha lareira" no lugar no que a día de hoxe aínda se albiscan restos de tella romana delimitados por unhas pedras.
"Nesta habitación apareceu moitísimo material e está parcialmente escavada", di Ramil, satisfeito cos traballos nun castro que "sempre dá sorpresas" e no que xa descubriron unha canle de desaugadoiro, pasos de escaleira na muralla ou construcións que confirman que o xacemento ten uns 2.000 anos e unha ocupación que se prolongou uns 500.
A maiores das escavacións na vivenda, encostada á zona amurallada, á beira do acceso á croa, tamén realizaron traballos para seguir descubrindo a muralla e tarefas de consolidación e limpeza en todas as zonas escavadas. "O obxectivo é seguir coa muralla, con esta vivenda e con outras, da época ou anteriores", indica Ramil, que explica que agora se fará unha recreación virtual do castro, a pesar de que queda moita superficie por escavar.
O rexedor da Pastoriza, Primitivo Iglesias, mostrou a súa intención de seguir apostando polas escavacións no castro que, ata o momento, financia integramente o Concello cuns 15.000 euros por campaña.
MEDIA DUCIA DE MUÍÑOS. Nesta última escavación, unha das pezas máis destacadas foron os muíños. Apareceron restos de catro na zona da lareira e outros no patio. En total, suman seis ou sete.
COITELOS OU COLARES. Estes últimos traballos tamén sacaron á luz dous restos de coitelos, unha agulla de bronce, dúas contas de pasta vítrea con dourado, relacionados cun colar, e unha chea de cerámica.
UN VIDRO. Outro dos destacados foi un fragmento dun vidro "relacionado con algo de perfumaría". "É material importado, non é propio do castro", di Ramil.