GUITIRIZ. Un veciño de Parga iniciaba este luns unha recollida de firmas virtual na plataforma Change.org en contra do proxecto presentado por Adif para suprimir os tres pasos a nivel da localidade. A iniciativa popular logrou en só unhas horas sumar máis de 500 apoios.
A petición manterase aberta ata que se fixe a data da reunión que Adif anunciaba hai uns días que prevé manter cos afectados para explicarlles o seu proxecto, incluído nun plan a nivel estatal que contempla a eliminación de ao redor de 4.000 en toda España.
A idea dos veciños, que mostraron en reiteradas ocasións a súa oposición aos plans de Adif por considerar que dividen en dous o pobo, é usar as firmas nesta reunión para reforzar a súa postura. Tamén prevén dirixilas, tal e como recolle a petición en Change, ao Ministerio de Fomento e ao Concello de Guitiriz, ademais da Adif.
O último proxecto remitido ao Concello guitiricense contempla a conservación da vía como está, valando os seus arredores e construíndo un túnel subterráneo para o paso de vehículos na zona onde está o principal paso a nivel e dous pasos elevados para os peóns nos extremos do centro urbano.
Esta proposta debateuse en reunións veciñais promovidas polo PP e o BNG, na que os veciños deixaron clara a súa rotunda oposición á mesma. O tema abordouse tamén en pleno a través dunha moción dos nacionalistas, secundada polos cinco grupos políticos da corporación, que rexeitaron así o proxecto e defenderon ademais a opción de que se desvíe a vía por fóra do pobo, que é a idea que levan anos defendendo os veciños.
O texto explicativo da recollida de firmas virtual recorda que esta non é a primeira vez que Adif presenta un plan de supresión: «Xa houbo proxectos similares e algún aínda máis ambicioso, pero non deixa de ser unha maneira máis de dividir Parga en dúas metades coma todas as propostas anteriores», di, reiterando a oposición veciñal a esta posibilidade.
Aluden ao prexudicial que sería esta decisión, «dende o punto de vista urbanístico, máis tamén no social», ao considerar que crearía «unha Parga de Arriba e unha Parga de Abaixo», ademais de ter consecuencias imprevisibles nun dos principais recursos da vila, as súas dúas feiras mensuais.
«Parga xa nunca máis sería a mesma que coñecemos», incide a petición, na que se recorda que os veciños conviven coa vía e o paso de trens desde 1875, «co progreso e a prosperidade que trouxo non seu momento e que fixo medrar a nosa vila, mais tamén coas molestias, atrancos, accidentes e mortes que se produciron ao seu carón».