O Rácing Vilalbés xa iniciou a conta atrás para partir na longa viaxe que o separa da localidade almeriense de Pulpí, onde se enfrontará ao Atlético Pulpileño no partido de volta da primeira eliminatoria da fase de ascenso a Segunda División B. O encontro, no que está todo por decidir tras o 0-0 da ida na Magdalena, será este domingo 27 a partir das 18.00 horas no estadio municipal de San Miguel.
O conxunto verdivermello afronta este duelo co obxectivo de superar a eliminatoria, batendo así unha nova marca para o club, xa que hai sete anos, no seu primeiro play off, quedou apeado da primeira rolda contra o Alhaurín de la Torre.
Para conseguir esta ansiada meta, o Vilalbés botará man da ilusión dos xogadores e o corpo técnico, pero tamén do alento e apoio de ao redor de medio centenar de afeccionados que afrontarán os máis de mil quilómetros para acompañar ao equipo. "É un bo número tendo en conta que é unha viaxe moi afastada e non é fácil organizar para ir, porque o luns a xente traballa", recoñeceu o presidente verdivermello, Francisco Ruiz, que tamén viaxará xunto a outro directivo.
Algúns afeccionados desprazaranse en coches particulares, pero a maior parte deles irá nun segundo autobús xunto á expedición do club, que está formada por 25 persoas entre xogadores, corpo técnico, utillero, delegado e fisioterapeuta.
A saída será este venres ás 23.00 horas desde o estadio Roca, unha vez finalice o último adestramento en Vilalba do equipo verdivermello e os futbolistas compartan unha cea. Por diante, 13 horas de desprazamento ata chegar a Pulpí ao redor das 12.00.
Xogadores e afección aloxaranse no hotel Águilas Playa, situado na localidade murciana de Águilas, a uns 25 quilómetros de Pulpí, onde se trasladará o equipo o sábado pola tarde para unha sesión de adestramento no campo de San Miguel.
O regreso a Vilalba está previsto para unha vez que finalice o encontro. E esta vez, tanto o club como a afección, espera ter unha viaxe de volta moito máis alegre que hai sete anos.
MERCHANDISING. O club continúa coa venda de camisetas e bufandas conmemorativas da que é a mellor tempada da historia da entidade, na que logrou finalizar terceiro con 71 puntos a competición regular. Estas pódense adquirir no estadio Roca co campo de herba artificial a un prezo de 15 euros o pack -dez cada artigo por separado-. Ademais, na páxina web de Proliga pódense atopar máis produtos do Vilalbés como gorras ou mochilas, entre outros.
