O estado de alarma sorprendeu a toda España hai agora un ano e moitos negocios, todos os que non eran esenciais, víronse obrigados a pechar as súas portas. Detrás daqueles primeiros meses, sucedéronse as ondas e con elas chegaron as restricións de aforamento ou os peches perimetrales que condicionaron a tantos comercios, negocios de hostalería e pemes.
Ao longo dos últimos meses, moitas administracións locais tomaron medidas para facilitar a supervivencia dos negocios, coa conxelación de taxas como a do lixo ou a auga; dando máis facilidades, por exemplo, para a colocación de terrazas na hostalería ou doando material como xel hidroalcohólico, máscaras ou pantallas. Ademais, houbo outras iniciativas como a do Concello de Muras, que estreou unha liña de axudas para pemes de 1.500 euros para sufragar recibos de luz.
Outros concellos decidiron lanzar un balón de osíxeno e apostaron por habilitar axudas directas para complementar as doutras administracións e para tratar de paliar as consecuencias da pandemia. As Pontes, Begonte, Guitiriz, Meira e A Pastoriza concederon xa 720.000 euros nesas axudas directas, que se centran, na maior parte dos casos, nos negocios que se viron obrigados a pechar, cunha especial atención < strong>hostalería, un dos sectores máis castigados ao longo desta crise sanitaria.
Moitas administracións conxelaron taxas ou doaron material aos negocios e Muras habilitou unha liña de axudas para a electricidade
O Concello pontés destina 490.000 euros ao Plan Municipal de Reactivación Económica e Laboral (Aprel), que promoveu tres convocatorias, de 340.000, 100.000 e 50.000 euros. Guitiriz concedeu 150.700 euros en axudas, que financiou co plan único da Deputación de Lugo, igual que Meira, que repartiu 38.000 euros, á espera de abrir unha nova convocatoria só para a hostalería.
En Begonte investíronse 33.000 euros entre as axudas da hostalería do ano pasado e as deste e na Pastoriza autónomos e negocios recibirán 8.000 euros nos próximos días. Na capital chairega, onde o Concello repartiu 336.000 euros a través dunha campaña de bonos para o comercio local, ultímase un plan que beneficie a todos os negocios. O goberno local xa presentou a súa proposta, a falta de negociar coa oposición e levala a pleno.
