O equipo español masculino de recurvo, do que forman parte os ponteses Miguel Alvariño e Dani Castro, non logrou praza para os Xogos Olímpicos de Tokio tras caer este sábado ante o de Estados Unidos por 6-2, nos cuartos de final do Preolímpico que se disputa en París.
Pablo Acha, Dani Castro e Miguel Alvariño acabaron o clasificatorio en novena posición cun total de 1.986 puntos e o seu primeiro rival foi o equipo de Polonia, ao que se impuxeron por 6-2 (52-53, 55-54, 57-53, 58-54) para entrar nos oitavos de final, fase na que gañaron a Canadá por 5-3 (55-55, 55-55, 56-53 e 55-55) e así conseguiron a clasificación para os cuartos de final.
Os españois xogáronse o pase ás semifinais contra Estados Unidos e aí estivo o seu teito (56- 57, 50-54, 57-53, 53-59) nunha competición que outorga tres prazas para Tokio en cada categoría e na que España buscaba por primeira vez na súa historia clasificar aos seus equipos masculino e feminino. Este sábado non o conseguiu o equipo masculino e este domingo será a quenda para o conxunto feminino, na competición feminina, coa quenda para Leyre Fernández, Inés de Velasco e Elia Canles.
Hai que recordar que o tiro con arco español ten aseguradas dúas prazas individuais para Tokio, que son as conseguidas por Pablo Acha nos Xogos Europeos de Minsk 2019 e a lograda por Inés de Velasco a principios de mes en Turquía.
Con todo, a designación oficial dos deportistas que acudirán a Tokio non se coñecerá ata logo da competición en París. Así, hai dúas prazas pero aínda non terminou o proceso selectivo, no que loita por forza Miguel Alvariño e Dani Castro.
