O Ministerio Fiscal solicita doce anos de cárcere para un pastoricense por provocar hai catro anos un incendio nun alpendre anexo a unha casa que puxo en risco a vida de dúas persoas. O xuízo, tras a investigación do Xulgado de Instrución número 2 de Mondoñedo, celebrarase os días 11 e 12 na Audiencia Provincial de Lugo.
O acusado, sen antecedentes penais, enfróntase a un delito de incendio con perigo para a vida ou integridade física das persoas. A fiscalía, a maiores dos doce anos de cárcere, solicita que indemnice ao parque comarcal de bombeiros de Vilalba con 2.987 euros, polos gastos de extinción, e a ambos os prexudicados, que saíron ilesos, polos danos ocasionados, que cifra en 22.972,75 euros.
Os feitos ocorreron na noite do 4 de xuño de 2017, entre as 00.30 e a 1.00, cando o acusado se aproximou á vivenda dos seus veciños, atravesando a pé unha leira entre os seus respectivos domicilios, e "aproveitando que ambos se atopaban xa na cama, rompeu os cristais das fiestras dun alpendre anexo e asperxeu en varios puntos algún líquido inflamable, presumiblemente un destilado pesado do petróleo, prendendo seguidamente lume que se propagou con rapidez polo alpendre, causando grandes danos", reza o escrito do fiscal, no que se detalla que a relación entre o procesado e os seus veciños "era mala". De feito, xa interpuxeran varias denuncias ante o Seprona contra el.
O día do incendio, o acusado, defende o fiscal, "realizou esta conduta coñecendo non só que o alpendre se atopaba a escasos metros da vivenda en que pasaban a noite os seus veciños, senón tamén que este contiña elementos altamente inflamables como alpacas de herba e un tractor cos seus compoñentes e combustible". "Iso implicaba unha razoable previsión de que o lume se propagaría con rapidez, como así foi, e que puidese devir en incontrolable, asumindo o acusado o risco de que se estendese cara á vivenda e de que se causase danos ás persoas que nela se atopasen", remarca.
Para apagar o incendio desprazouse unha pa mixta do Concello da Pastoriza e dous vehículos do parque comarcal de bombeiros de Vilalba. No alpendre, cuxa reparación custou 13.340,25 euros, destruíronse 16.000 quilos de palla, un tractor John Deere cos seus apeiros, unha escaleira de madeira, uns aumentos de remolque e uns postes de piñeiro, valorado todo iso en 9.632,50 euros.
