Catro persoas resultaron feridas este sábado nun choque frontolateral entre dous turismos rexistrado en Guitiriz, na estrada que une Parga e Momán (LU-170). O sinistro ocorreu pouco despois das 16.22 horas no quilómetro 0,600 da vía, na saída de Parga da A-6, atendendo aos datos da Garda Civil de Tráfico. Un dos vehículos circulaba en sentido Momán e o outro incorporábase á estrada desde a autovía.
Tres dos lesionados na colisión viaxaban nun vehículo e foron trasladados ao punto de atención continuada (PAC) de Guitiriz. A cuarta persoa ferida era a condutora do outro vehículo. En principio, as lesións dos afectados non parecían revestir gravidade.
A central do 112 avisou os Bombeiros de Vilalba ante a posibilidade de que unha persoa que non podía abrir a porta do coche estivese atrapada, pero finalmente non foi necesaria a súa intervención porque o persoal do 061 axudouna a saír.
