Unha persoa resultou ferida tras producirse este luns unha colisión frontal entre un turismo e un vehículo articulado na Nacional 6, no punto quilométrico 527,900, ao seu paso polo lugar de Pacios, no municipio de Begonte.
Un particular foi o que deu o aviso ao redor das dez da mañá á central de urxencias do 112 Galicia, indicando que nun principio non había feridos, pero despois informou de que unha persoa si precisaba asistencia ao atopase un pouco aparvada. Desde o 112 mobilizouse a Urxencias Médicas e ao subsector de Tráfico de Lugo e informouse aos bombeiros de Vilalba e ao servizo de conservación de estradas.
Este non foi o único incidente nas estradas chairegas, xa que ás 9.20 aproximadamente produciuse unha saída de vía na LU-P-1611, no quilómetro 97, na parroquia de Azúmara, en Castro de Rei. Neste caso, tamén foi un particular quen alertou ao 112, indicando que un vehículo se saíu da vía e chocou contra unha varanda, que o seu condutor estaba ferido e que o turismo entorpecía un pouco a circulación.
Ao lugar mobilizouse ao 061 e ao subsector de Tráfico de Lugo.
