O Real Aeroclub de Lugo informou de que a Patrulla Águila, o grupo de voo acrobático do Exército do Aire, cuxa participación estaba prevista no XIV Critérium Aeronáutico e nas actividades programadas con motivo da XXXVI Volta Aérea a Galicia, finalmente non poderá tomar parte neste evento por motivos "sobrevindos". Ambos os eventos desenvolveranse entre os días 25 e 28 de xullo co aeródromo de Rozas, en Castro de Rei, como base.
Un dos seus organizadores, Francisco Abelleira, explicou que o Exército do aire se puxo en contacto hai uns días cos responsables do Critérium para informar de que, finalmente, a Patrulla Águila non podería participar nas exhibicións previstas. A cambio, si estará "un par de días" o Grupo 43 da Forza Aérea, que tamén realizará unha exhibición de medios.
Así mesmo, informou de que na Volta Aérea a Galicia participarán unha decena de aeronaves, cada unha delas con dúas persoas como tripulación. Nesta ocasión fíxose coincidir a última etapa da Volta Aérea a España co Critérium, de modo que o sábado, día 27, aterrarán en Rozas unhas "corenta aeronaves" que participan nesta proba.
Como entidade organizadora de ambas as citas, o Real Aeroclub de Lugo informou de que para esta edición figura no programa "unha gran variedade de actividades pensadas para que o público poida participar e achegarse ao mundo da aviación en xeral" nun evento que é "de acceso gratuíto".
Entre outras actividades, no programa figuran saltos en paracaídas, voos en distintos tipos de aeronaves —baixo sorteo—, voos en paramotores ou visitas a helicópteros e avións de distintos organismos oficiais, como Policía Nacional, Dirección Xeral de Tráfico (DXT), Garda Civil ou Salvamento Marítimo.
O programa tamén inclúe exhibicións, de voos acrobáticos, de drons e aeromodelos ou de avións e helicópteros históricos. Ademais, haberá un simulador de voo, diversas exposicións sobre o mundo da aeronáutica e un espazo con actividades para os nenos.
