Os veciños de Parga, que se concentraron este mércores en Guitiriz, continuarán o sábado co seu calendario de mobilizacións para esixir a reapertura total do centro de saúde. Esta vez farano cunha cadea humana que percorrerá uns 700 metros desde a estación de tren ao ambulatorio, pasando pola oficina de Abanca.
"Así unimos as tres puntas, as nosas reivindicacións", indica Afonso Losada, da Plataforma #Parganonsedivide, un colectivo que xunto á comunidade de montes, lidera as mobilizacións.
A cadea humana, na que todos os participantes deben levar máscara e estarán unidos por lazos verdes, está convocada para as 19.30 horas e haberá tres puntos de encontro para organizarse: a estación de tren, o Campo da Feira e o centro de saúde.
"Intentaremos xuntar ao maior número de xente posible", di Losada, consciente de que é un reto, pero necesario, para visibilizar o seu conflito.
Á concentración do mércores, convocada fronte ao centro de saúde de Guitiriz, sumáronse uns 150 veciños. "Vimos aquí para visualizar que ou problema de Parga tamén vai ser de Guitiriz", explican desde a plataforma, que aproveitou a concentración para achegarse a Abanca e reivindicar que a normalidade tamén ten que volver á oficina bancaria. "Hai unhas colas tremendas e agora a situación xa é diferente", din.
Da concentración do mércores, ademais, saíu o acordo de que este luns se convocará un pleno extraordinario telemático ás 19.00 horas para aprobar unha declaración institucional de apoio.
