A comisión organizadora da Moexmu, unha das feiras agrogandeiras máis importantes de Galicia, que se celebra en Muimenta, informou de que a edición deste ano, prevista para os días 9, 10 e 11 de abril, quedou aprazada como consecuencia da situación sanitaria provocada pola covid-19 e as recomendacións das autoridades sanitarias.
Ademais da feira agrogandeira, quedaron tamén aprazadas todas as actividades aparelladas á Moexmu, como o concurso, exposición e poxa de gando selecto, que é o único que se celebra na provincia desde hai unha década, ou o Concurso de Can de Palleiro, puntuable para o campionato galego.
Para tomar esta decisión, a organización pulsou a opinión do presidente de Africor Lugo, Manuel Sandamil, das administracións que colaboran coa feira, dos patrocinadores dos concursos de gando, dos membros das diferentes comisións organizadoras e demais colaboradores.
"Debemos recordar que, as datas previstas para a Moexmu, serían as do fin de semana posterior a Semana Santa. Nesas circunstancias, faise máis aconsellable aprazar a súa celebración, dado que nesas datas festivas pode producirse unha maior mobilidade", precisan os organizadores nun comunicado.
"É a decisión máis responsable que podemos tomar", engade.
De momento, non se descarta a posibilidade de que a feira ou algunha das súas actividades poida realizarse este ano, pero "se isto fose posible", sería sempre "primando a saúde e anunciando a data e o programa con tempo suficiente", conclúe a comisión organizadora.
