Dous meses despois do fatídico suceso empézanse a confirmar informacións sobre un tráxico día que marcará para sempre a moitas persoas. O pai da Desirée, José Manuel Leal, insiste en que alguén capaz de facerlle algo así a un neno merece cumprir a pena máxima e sinala á súa exparella, a presunta autora do crime, como "un auténtico monstro".
"Queriámonos moitísimo e arrebatoume o que máis quería, para min é coma se me quitasen a vida o pasado 3 de maio", di o pai de Desirée, que se mostra "sen forzas" para falar sobre os feitos que confirma a autopsia, á vez que pide "respecto para a súa dor" e canaliza as comunicacións a través do seu avogado.
José Manuel Leal, que sempre mostrou a súa confianza na investigación por parte do xulgado de Vilalba e da Garda Civil a pesar de que tiveron que pasar dous meses para coñecer información do caso, mostrou en reiteradas ocasións a súa intención de solicitar a prisión permanente revisable para a súa exparella.
