José Manuel Leal, o pai de Desirée, a nena de sete anos que aparecía morta na casa da nai en maio de 2019 en Muimenta –no municipio de Cospeito–, confía en que o xuízo contra a exmuller e presunta asasina se celebre "en oito meses", é dicir, antes de que conclúa 2021.
No xulgado de Vilalba leva o caso, xa só falta o escrito da avogada da defensa, posto que tanto a Fiscalía, como a acusación popular –encarnada pola Fundación Amigos de Galicia– e o particular –en nome do pai– presentaron os cargos contra a muller, para a que solicitan a prisión permanente revisable.
Ante estas peticións, o pai da menor que "satisfeito" non "é a palabra", xa que el iría máis aló e solicitaría "a cadea perpetua para esta escoria humana", dixo, en alusión á súa exmuller, que se atopa na cárcere de Teixeiro.
Neste contexto, José Manuel Leal incidiu en que hai que ir "á pena máxima que existe no Código Penal", que é a permanente revisable, pero insistiu en que este texto tería que ser revisado, "como se fai co Código de Circulación".
"Neste país, parte da sociedade está convencida de que os cárceres están para reinsertar, claro que é para reinsertar a certa clase de persoas que comete delitos, pero quen quita a vida a unha persoa ou comete unha violación para a miña esas persoas non son reinsertables", valorou.
Así, cualificou á que foi a súa muller –no momento dos feitos, xa levaban catro anos separados– como "un monstro humano".
O XUíZO, "CADA VEZ MÁIS PRETO". José Manuel Leal non dubida de que o xuízo está "cada vez máis cerca", xa que expón un horizonte de oito "meses" para a vista oral que se celebrará na Audiencia Provincial baixo a fórmula de xurado popular. Isto lévao a interpretar que talvez se poida celebrar antes de que finalice o ano .
"Aquí (no xulgado de Vilalba) dáse por terminada a fase de instrución e pasará á Audiencia de Lugo. E en Lugo tamén terá os seus tempos. Ademais, pódense pedir actuacións novas, hai os seus tempos", engadiu Leal.
Finalmente, o pai de Desirée aproveitou para censurar a instrución que leva o xulgado de Vilalba, lamentando as "présas" da titular para dar traslado das dilixencias a Lugo e os "fallos" cometidos durante a investigación.
