O que o proba, repite. Ou iso din todos aqueles que decidiron gozar dunha escapada de vacacións como unha seda. O ‘autocaravaning' está de moda e é este o sector polo que apostou a pontesa Cecilia García Picallo para estrearse como empresaria turística.
"Fixemos varias rutas e nalgunha ocasión custounos atopar autocaravana porque hai moita demanda", explica a pontesa, indicando que foi isto o que a motivou a comprar o seu propio vehículo para moverse e alugalo.
Así nace Eume Tours unha firma que acaba practicamente de arrincar, e que non só ofrecerá unha autocaravana para gozar de viaxes de aquí cara alá. "O noso proxecto vai un paso máis", di Cecilia.
"A idea é intentar axudar a promocionar a comarca do Eume. Para iso, ademais de alugar a autocaravana, ofreceremos ás familias packs con actividades deportivas que se poidan realizar pola zona. De momento temos táboas de paddle surf e patinetes eléctricos", explica a empresaria, que co tempo quere seguir ampliando o abanico de opcións.
A firma, que quere axudar coa súa actividade a promocionar a comarca, ten completo xa todo o mes de agosto
Así, tamén está na súa mente poder ofrecer aos turistas información e tracks sobre rutas BTT, carreiros para camiñadas ou todo o que sexa susceptible de converterse nun recurso a descubrir polos que se despracen desde fóra.
Aínda que acaba de rodar cos seus primeiros clientes, Eume Tours xa ten todo este mes completo. "Debémosllo a Lolo e Graciela, da Autocaravanas As Pontesaxudáronnos moito e cedéronnos clientes", asegura Cecilia, consciente de que veranear como unha seda é unha das opcións preferidas.
"Co tema do covid incrementouse, viaxar así non exponche a nada. Ti decides onde vais en cada momento", explica a pontesa, confirmando que o seu servizo está orientado "ás familias".
"A autocaravana ten seis prazas, ideal para unha familia. Conta cunha cama grande, outra supletoria e unha litera. Ademais das clásicas prestacións como baño e ducha, unha ampla neveira, cociña ou toldo e mesa", enumera Cecilia, avanzando ademais que Eume Tours incluirase dentro doutro proxecto maior que aínda está en proceso.
