A firma eólica Norvento, nunha aposta por reducir o impacto ambiental durante o transporte dos compoñentes dos aeroxeradores cara ao pastoricense parque Carracedo, emprega o sistema 'bladelifter', unha técnica coa que a aspa vai inclinada no tráiler ata un máximo de 65 graos.
Para levar as pezas de 67 metros desde A Pastoriza ata a subestación —uns dez quilómetros en dúas horas e media—, son indispensables dous traballadores: un para monitorizar a nivelación da plataforma e outro para regular a elevación da aspa e controlar a velocidade do vento, algo que causou gran expectación entre os veciños.
A empresa lucense é a primeira en utilizar este mecanismo en España, de modo que "redúcese o impacto nas obras", apuntaba o director xeral, Iván Nogueiras, durante a visita ao penúltimo transporte dunha aspa cara a Carracedo, na que tamén estivo presente a xefa territorial de Industria en Lugo, Pilar Fernández. Nogueiras tamén indicaba que "en Galicia, os accesos ás zonas de vento son difíciles e non están preparados para o transporte de pas de 70 ou 80 metros", co que este método "vai ser imprescindible en moitos lugares".
A ampliación de viarias, a talla de árbores ou a modificación de accesos son algúns dos obstáculos que Norvento evita co sistema 'bladelifter', ao supor "un radio de xiro moi inferior ao que necesita un transporte normal", matizan desde a firma. Ademais avanzan que a posta en marcha dos seis parques que ten en construción producirase "antes de decembro". Dous dos tres aeroxeradores cos que conta o parque Carracedo están preto de finalizar a súa instalación.
