Cunhas impresionantes vistas ao val de Xelgariz, as montañas de Montouto ou A Gañidora e os montes de Carracedo e O Viveiro, estréase o novo reclamo turístico de Muras: o Banco da Serra, creado por un veciño e carpinteiro de profesión, Alberto Vilaboy.
"Fíxeno máis que nada por un tema sentimental en recordo a un proxecto que tiña co meu pai. Está nunha leira privada, pero aberta a todo o que queira vir, e ao lado dun camiño público", explica, sobre unha senda que el mesmo acondicionou —do mesmo xeito que a zona onde se sitúa o banco, que ata fai nada estaba a monte— polo que hai que andar uns 150 metros desde que acaba a estrada.
Situado no lugar da Serra, na parroquia do Burgo —a pouca distancia da aldea etnográfica de Carelle Grande—, e sinalizado xa por Google Maps, este novo banco, que espera recibir as visitas dalgúns curiosos, está feito "en madeira de carballo, dúas pezas enteiras que ían ir para ou lume", explica Alberto, mentres indica algunhas das bondades deste asento no que el mesmo se encargou de tallar o nome, e que foi creado para gozar da natureza máis pura.
"É un sitio moi especial, tranquilo, sobre todo de noite, e non que tes unhas vistas impresionantes a unhas fragas virxes e ao pé da Rede Natura", indica o creador deste novo espazo en Muras, que non espera que compita con outros bancos "masificados" como o de Loiba, por exemplo, pero si que ofreza a oportunidade de ensinarlle "á xente todo o potencial que temos aquí e que hai que tratar de poñer en valor", di Vilaboy.
"Levaba sete anos en Xangai (China) por temas de traballo, e en xaneiro volvín ás orixes. Dinme conta cando estaba lonxe de que hai moitas sensacións que non se poden mercar con cartos", afirma Alberto, que con esta iniciativa busca achegar a súa "grao de area" para ofrecer precisamente ese tipo de experiencias na natureza.
UN CEO ESPECIAL. Os primeiros que viron as potencialidades deste lugar, no que non hai veciños nin apenas contaminación lumínica, foron un grupo de amantes da astrofotografía, que xa celebraron algunha sesión desde o Banco da Serra conseguindo impactantes imaxes da lúa.
Recentemente un grupo subiu ao monte de Carracedo e o fotógrafo, Marcos López Alonso, vicepresidente da Asociación de Fotografía Ferrolterra e xefe da sección de astronomía da Sociedade Galega de Historia Natural, disparou desde un banco que espera seguir recibindo visitantes.
