A provincia de Lugo fíxose este domingo un pouco máis doce coa Feira do Mel de Montaña de Muras e a de Baleira, dúas citas que a pesar da súa curta idade, con cinco e tres anos respectivamente, xa se consolidaron no calendario gastronómico do outono lucense.
Ambas as xornadas desafiaron á climatoloxía e nin as baixas temperaturas nin a choiva intermitente conseguiron embazalas.
A quinta Feira do Mel de Montaña de Muras repetiu un novo éxito cunha cita multitudinaria que reuniu baixo unha carpa que non deixa de crecer a numerosos asistentes, que puideron comprar pero tamén catar o mel.
O cociñeiro Antonio Díaz e o seu equipo elaboraron e repartiron centos de pequenos aperitivos de degustación, que incluíron empanada de níscalos con mexillóns, croquetas de cachena con maionesa de mel e mostaza, sopa Samaín, con produtos de tempada, callos con cogomelos e xeado de mel, elaborado coa gañadora do concurso do ano pasado.
Mario López, do colexio de Navia de Suarna, foi o gañador do concurso de debuxo de Baleira e o autor do cartel desta feira
Nesta edición da cata, María Dolores Lage, de Viveiro, alzouse co título de mellor mel de Muras e mellor monofloral, cun mel de brezo recollida na montaña muresa. A outra finalista foi María Isabel Rei, de Muras.
"Estamos moi contentos da afluencia de xente e da resposta que ten esta feira", expresou o rexedor de Muras, Manuel Requeijo, mentres o edil de medio rural, Mario Rouco, destacou a importancia de potenciar "un produto cun valor enorme e que é noso".
A feira, que incluíu talleres para nenos e animación musical, apostou por dúas novidades: unha xigantesca exposición micolóxica que atraeu as miradas de moitos e un espichado de sidra tradicional, que foi un éxito. "Puxéronse en contacto connosco para irmanar o mel e a sidra e pareceunos moi boa idea", expresou Juan Cañal, o alcalde de Nava, de Asturias, que valorou unha sinerxía que pode abrir portas a produtos "de primeira calidade".
En Baleira, a terceira edición da Feira do Mel que organiza o GDR-3 Asociación Montes e Vales e que contou coa presenza de 19 expositores, tamén foi un éxito, con máis incondicionais entre o público e máis actividades.
Ademais das xornadas técnicas do sábado, organizáronse dous talleres. Un foi impartido pola apicultora naviega María do Mar Ramos, quen ensinou aos asistentes a facer xabóns artesanais a partir do mel. O outro, a cargo da empresa Imaxinatia, tivo a cera como protagonista.
A xornada pechouse coa entrega dos premios do concurso de debuxo. O traballo gañador, cuxo autor é Mario López Fernández, do colexio de Navia de Suarna, é o que ilustra o cartel deste ano e o seu autor recibiu un vale de material escolar por 60 euros e o libro O país do abeyeiro. A segunda foi Jimena Picos, do colexio de Becerreá, que recibiu un vale de material escolar por 40 euros e un exemplar do mesmo libro. Tamén houbo un recoñecemento especial para os seus colexios.
