Unha brutal colisión por alcance rexistrada este xoves na autovía AG-64, á altura do termo municipal das Pontes e en sentido Ferrol, saldouse con dúas irmás xemelgas da Pontenova feridas -ambas responden as iniciais M.M.L., e teñen 27 anos de idade-.
O sinistro tivo lugar minutos antes das doce do mediodía, cando por causas que se descoñecen, o condutor doutro vehículo alcanzou ao das feridas, que empezou a dar voltas de campá sen control pola beiravía da autovía durante máis de 100 metros, quedando esparexidos pola zona diferentes elementos do turismo e das pertenzas que as mozas portaban no seu interior.
Foi un particular o que alertou do accidente ao centro de urxencias do 112 Galicia, que rapidamente mobilizou ata o punto quilométrico 37 da AG-64 -apenas dous quilómetros antes da saída cara ao polígono industrial dos Airíos- a varios axentes da Garda Civil e da Policía Local das Pontes, que se encargaron de regular o tráfico na zona, onde houbo que cortar parte do carril dereito e tamén do esquerdo, xa que foi onde quedou parado o outro vehículo implicado, uns metros máis adiante.
Ademais, acudiu ata o lugar dos feitos unha dotación do parque comarcal de bombeiros do Eume, que foron os encargados de excarcerar ás dúas mozas do vehículo, cuxa posición impedía que puidesen saír do mesmo, aínda que permaneceron conscientes en todo momento, segundo precisaron algunhas testemuñas.
Tamén se mobilizaron ata o punto onde se produciu o sinistro voluntarios da agrupación de Protección Civil das Pontes, operarios de mantemento de estradas e dúas ambulancias, unha de soporte vital avanzado e outra de soporte vital básico medicalizada co equipo do centro de saúde da localidade.
Foi o persoal médico desprazado o que nun primeiro momento tratou de estabilizar ás mozas no punto onde ocorreu a colisión, e case unha hora despois do accidente, trasladounas ao centro hospitalario Arquitecto Marcide de Ferrol, onde se recuperan das graves feridas sufridas aínda que non se teme polas súas vidas.
