Muimenta lamenta o falecemento aos 77 anos de Ángel López López, fundador da firma de carpintería metálica Allplas, que deu os seus primeiros pasos nesta localidade chairega para logo trasladarse ao polígono do Ceao e ao parque empresarial de Castro de Ribeiras de Lea, onde segue á fronte da compañía o seu fillo, Ángel López Lugilde.
Este empresario lucense chegou sendo moi novo a Muimenta, onde inicialmente traballou nun taller de maquinaria agrícola, para montar ao pouco tempo xunto a outro socio a Carpintería Metálica López e Buide, que deu emprego a algúns mozos da localidade desde finais dos anos 60 e ata case principios dos 90, cando constituíu Allplas que despois trasladou a Lugo.
Lito, como o coñecían cariñosamente en Muimenta, será recordado non só pola súa implicación nas primeiras comisións organizadoras da Moexmu, senón tamén por outras iniciativas veciñais como a instalación dunha depuradora de auga.
