Antonio Morán Crecente, un dos fundadores da Discoteca Hermo de Muimenta, faleceu este venres aos 87 anos, precisamente no día en que o emblemático establecemento abre de novo as súas portas baixo o mando da Plenario Veiga.
"A familia pediunos que seguísemos co noso plan de reapertura, e sobre todo pediunos que rendiramos unha homenaxe como o se merece, enchendo a súa sala e gozando dela como a el lle gustaba", explicaba este venres a nova dirección da Hermo, que abrirá as súas portas ás 00.00 horas.
Este venres quedará instalada a capela ardente no Tanatorio Alvariño e o funeral por Antonio Morán terá lugar o sábado ás 17.00 horas na igrexa parroquial de Muimenta.
Da experiencia como ramista a abrir un emblema da noite en Galicia
Foi no ano 1975 cando Antonio Morán, en sociedade co seu irmán Perfecto, apostou por converter a súa experiencia como ramista habitual das festas de Muimenta nunha iniciativa empresarial. O 9 de novembro, abría a sala de festas Hermo co obxectivo de amenizar as noites do domingo durante os meses de inverno.
Nas súas máis de catro décadas de vida, pola Hermo desfilaron artistas como Manolo Escobar ou Juan Magán e sorteáronse coches e cuantiosos premios en metálico, unhas características que lle deron fama a nivel galego á iniciativa de Antonio Morán e o seu irmán Perfecto.
A discoteca cambiou de mans o pasado mes de outubro, cando a xerencia pasou da familia Morán a Plenario Veiga.
Nas súas máis de catro décadas de vida, pola Hermo desfilaron artistas como Manolo Escobar ou Juan Magán e sorteáronse coches e cuantiosos premios en metálico, unhas características que lle deron fama a nivel galego á iniciativa de Antonio Morán e o seu irmán Perfecto.
A discoteca cambiou de mans o pasado mes de outubro, cando a xerencia pasou da familia Morán a Plenario Veiga.
