Un milleiro de traballadores e camioneiros da central térmica das Pontes iniciaron no mediodía deste luns unha concentración no centro da Coruña para pedir solucións inmediatas para o complexo, que terminaron co compromiso do Goberno de convocar este mes unha mesa de traballo sobre o seu futuro.
A protesta, organizada ante a Delegación do Goberno en Galicia, reclamaba reunións a todos os niveis para que o proceso de descarbonización se faga con tempo, e foi o propio delegado, Javier Losada, o que pouco despois lles avanzou que o Ministerio de Transición Ecolóxica convocará nas próximas semanas unha mesa de traballo para abordar de xeito conxunto este tema.
Representantes políticos de todos os partidos, entre eles o presidente da Deputación, o socialista Valentín González Formoso, tamén alcalde das Pontes, e o secretario xeral do PPdeG, Miguel Tellado, secundaron a protesta, que se desenvolveu con normalidade e sen incidentes logo da celebrada ante a Xunta a semana pasada en Santiago.
Ademais do milleiro de persoas que se foron sumando progresivamente a esta concentración, acudiron uns 120 camións, que finalmente quedaron aparcados na zona do Ofimático, á entrada da cidade, segundo informaron a Efe fontes da Policía Local.
A planta de Endesa nas Pontes, que figura entre as vinte máis contaminantes de Europa, está parcialmente funcionando con dous dos seus catro xeradores parados tras o anuncio dun investimento duns 200 millóns de euros que poderían permitir ampliar a súa actividade uns quince anos máis.
Neste complexo traballan 250 persoas e outras tantas en empresas auxiliares, así como uns 150 camioneiros que transportan o carbón á planta e outros 150 empregados de empresas subministradoras, que reclaman un plan para levar a cabo un proceso de transición cara á descarbonización "regulado e ordenado".
O presidente da Asociación do Colectivo do Transporte do Carbón, Manolo Bouza, advertiu de que "o mundo do transporte está amolado porque pasan os días, pasan os meses e todo segue igual, moitas palabras pero non hai solución". Segundo Bouza, dita solución pasaría "por pór a central a andar; hai carbón, hai de todo, que miren o do céntimo verde dunha vez porque isto vai explotar nos narices de alguén, seguro, e váiselle a escapar das mans a moita xente", sostén, porque "esta xente está cada vez máis desesperada".
"Os transportistas teñen débedas por enriba dos 100.000 euros", sinalou despois de que hai un ano se lles trasladase o compromiso de carga de traballo na central térmica de Endesa, nas Pontes, segundo sosteñen.
O delegado do Goberno en Galicia, Javier Losada, recibiu pouco despois do comezo da protesta a un grupo de traballo sobre este conflito no que estivo presente Formoso, que se mostrou "satisfeito" con este "pequeno obxectivo conseguido" de reunirse coa ministra de Transición Ecolóxica, Teresa Ribeira, para esclarecer o futuro máis inmediato do complexo.
Para os representantes sindicais das empresas auxiliares, "non se pode aceptar un cambio de modelo sen garantía de emprego", asegura Alberte Amado (CIG), e "é prioritaria a próxima reunión entre todas as partes coa implicación do Goberno Galego", engade Javier Carreiro (UXT).
Neste contexto, o delegado do Goberno en Galicia instou á Xunta a que se some de xeito decidido " imprescindible" unidade política que require este proceso.
Pola súa banda, Miguel Tellado trasladou o apoio do PP á protesta porque os traballadores "demandan algo básico, que é seguir traballando", e sostén que o Goberno dispón de ferramentas para manter a central en funcionamento, polo que dixo esperar de Losada que sexa "o primeiro que defenda o que necesita Galicia" ou, pola contra, "non nos vale".
Unhas 650 familias dependen da solución que se lle dea a este conflito, subliñou o alcalde das Pontes, que advertiu tamén do "sinsentido" de que a esta central "non se lle dea unha oportunidade", pois a pesar de que o carbón é unha fonte de enerxía en extinción en Europa, pódese facer "paulatinamente". Por iso, pediu compromiso e tamén paciencia a Endesa e que espere a que o ministerio "mova ficha" e convoque a mesa con todas as partes implicadas.
